أحمد موسى: الشعب زعلان ومقهور.. أداء المنتخب في كأس العرب لا يطاق

عبر الإعلامي أحمد موسى عن حزنه وغضبه الشديدين من الأداء الباهت للمنتخب الوطني في بطولة كأس العرب، مؤكدًا أنه يعكس مشاعر "الشعب اللي زعلان ومقهور".

نقد لاذع للأداء و"الخروج المهين"

انتقد موسى، خلال تقديمه برنامج على مسؤوليتي، والمذاع عبر قناة صدى البلد، فشل المنتخب في تحقيق أي فوز بالبطولة، متسائلًا بمرارة: "نتفرج على الكورة في مصر عشان دمك يتحرق؟ إحنا مش عارفين نفوز ماتش في كأس العرب".

ووجه كلامًا قاسيًا للمدرب حلمي طولان، الذي صرح بأنه لم يجد الدعم من المسؤولين، قائلًا: "لما أنت محدش بيدعمك ليه روحت البطولة، وكنت طلعت وأتكلمت ولا جاي تقول دلوقتي بعد الخروج المهين؟".

تساؤلات حول الدوري المصري

انتقل موسى بحدة إلى نقد حالة الدوري المصري، موجهًا كلامه للنائب أحمد دياب: "هو إحنا عندنا دوري يا سيادة النائب أحمد دياب؟ ليه موقفتش الدوري؟ إحنا أصلًا معندناش دوري إحنا بنضحك على بعض".

وأكد أن الفوضى الحالية تعكس عدم اهتمام، مشيرًا إلى أنه كشخص متابع لكرة القدم، لا يعرف من هو الفريق المتصدر، وأن زملاءه في الكنترول هم من أخبروه بأن "سيراميكا هو الأول".

وقال موسى:" روحنا كأس العرب، بمنتخب تعبان وشويه مكسحين، مفيش كورة، ألف باء رياضة مش موجودة، أول ماتش الكويت قولت المنتخب ده لازم يرجع النهاردة، ما يكملش، يوم الإمارات، النهاردة قولت يمكن، أنا عارف قوة منتخب الأردن، المنتخب الللي فاز علينا النهاردة ده التاني، لو الأول كان بيلاعبنا، كان فاز علينا 6، 7، الأردن هيعمل شغل كويس في كأس العالم.

الناس ملهاش علاقة بمنتخب أول وتاني

وأضاف،:"ناصر ماهر فين، طاهر محمد طاهر فين، الناس ملهاش علاقة بمنتخب أول وتاني، الناس ليها علاقة بمنتخب مصر، دي سمعة مصر، فين المنظومة، مين اللي بيتكلم عن سمعة البلد، بوجه كلامي لكل المسؤولين من وزير الشباب والرياضة لأصغر مسؤول، مكنتش تروح، هتقولي لجنة، مفيش حاجة اسمها لجنة.

منتخب محترم

وتابع:"باين من دلوقتي، ليه معملتوش منتخب محترم مع بعض يروح الدوحة، كل واحد خد الحتة بتاعته، وراح بيها، آلاف رايح يشجعوا بيعيطوا واحنا بنعطي، أنا ما اشوفتش كورة من بعد حسن شحاته ربنا يديه الصحة، اللي لاعب البرازيل وإيطاليا، عندنا صلاح، ومرموش، ومصطفى محمد".