نهاد أبو القمصان تفجّر الجدل: «اكتبوا أملاككم لبناتكم.. حماية الذرية واجب»
انتقدت المحامية والحقوقية نهاد أبو القمصان الجدل المتكرر حول "كتابة الأملاك للبنات" مؤكدة أن الهبة حق شرعي وقانوني لا علاقة له بالميراث، وأن حماية البنات والذرية الضعاف واجب ديني واجتماعي، خاصة في ظل ما وصفته بـ"ممارسات قاسية" يتعرضن لها من بعض الأقارب بعد وفاة العائل.
وقالت "أبو القمصان" في منشور لها عبر حسابها الرسمي على موقع تبادل الصور والفيديوهات "إنستجرام": "اوهبو كل أموالكو للبنات أو الأولاد الصغيرين إذا خشيتم على ذريتكم الضعاف".. كل فترة تظهر دعاوى بتقول إن “كتابة الأملاك للبنات ظلم… وحرمان للورثة”. مع إن الكلام ده مبني على خلط واضح بين التركة و الهبة".
"الهبة 100% شرعية".. نهاد أبو القمصان تدافع عن كتابة الأملاك للبنات
وأضافت: "التركة: هي ما تركه المتوفى يعنى كل ما يملكه الإنسان وقت وفاته. والتركة لا توزع الا بعد الوصية والدين "مِنْ بَعْدِ وَصِيَّةٍ يُوصِي بِهَا أَوْ دَيْنٍ [النساء:11] أما أي شيء يهبه الانسان فى حياته لأولاده وهو حي — شقة، أرض، فلوس، تأمين — فده ليس ميراثًا، ولا يدخل في التركة… وهو تصرف شرعي وقانوني ١٠٠٪".
واستنكرت الحقوقية نهاد أبو القمصان قائلة: "والغريب إن الاعتراضات دي بتيجي غالبًا من الناس اللي بيمارسوا الظلم فعلاً: أعمام بيطردوا البنات من بيت أبوهم رغم إن نصيبهم ما يكمّلش ٢٠٪ لان البنات اصلا ورثهم ٢/٣ ثلثين وامهم ١/٨ ثمن يعنى مع بعض اكثر من ثلاث ارباع التركة، وأخوال سرقوا ميراث أختهم وهي عايشة… ولما شقيت وتعبت وعملت قرشين ، ماتت مدّوا إيديهم على حق ولادها وطردوهم من بيتهم قبل ما يخلصو الدفنة، وجد وجدة يشوفوا إن الزوجة وعيالها “خدوا خير ابنهم”.
وأشارت: "وأعتقد إن فاكرين زوجة القاضى وابنها اللى عمره سنة وحماتها وحماها ضربوها وبهدلوها وكانو عايزين يطردوها هى وابنها اللى المفروض عوض عن ابنهم اللى خطفه الموت!! حماية الذرية الضعاف أمر إلهى، ومفيش فى مجتمعنا اضعف من البنات اللى كل فاشل وفاسد بيستعرض قوته عليهم وكأن الشرع اتكتب علشان مزاجهم. والأغرب إن بعض الأصوات اللي بتتكلم عن “الشرع” عندها أصلًا مشاكل أخلاقية خطيرة: فصل من الأزهر، كذب، زواج سري، وخداع بنات باختراعات “شرعية” علشان ياخد اللي مش من حقه. فمين بالضبط اللي بيدافع عن الشرع؟ مين اللي بيستغل الشرع ويتاجر بيه ؟".
وأكملت: "ربنا قال “وَلْيَخْشَ الَّذِينَ لَوْ تَرَكُوا ذُرِّيَّةً ضِعَافًا خَافُوا عَلَيْهِمْ…” سورة النساء - الآية ٩ وده معناه حماية البنات… حماية الأولاد… حماية الأسرة كلها.
"مين بيدافع عن الشرع؟".. نهاد أبو القمصان تهاجم تجّار الميراث
الهبة مش حرمان… الحل للحفظ على صاحب / صاحبة المال.. الهبة المشروطة أو نقل الملكية مع ابقاء حق الانتفاع وللعلم فى بلدان إسلامية زى ايران حلت الموضوع بالقانون لو بنت واحدة او بنتين بياخدوا التركة كلها بالقانون
الهبة أحيانًا هي الباب الوحيد لأمان البنات بعد فقد أبوهم او أمهم. واللي عايز يطبق الشرع بضمير، يبدأ بالعدل… مش بالصوت العالي".
