يضرب فى المليان.. عبد الناصر زيدان يدعم رسالة عمرو سلامة بشان زيزو
علّق الإعلامي عبد الناصر زيدان على الرسالة التي وجهها المخرج عمرو سلامة إلى مجلس إدارة نادي الزمالك بشأن عدم حسم ملف تجديد عقد نجم الفريق أحمد سيد "زيزو".
وعبر حسابه الشخصي على موقع التواصل الاجتماعي "فيسبوك"، أعرب زيدان عن تأييده الشديد لرسالة سلامة، واصفًا إياها بأنها "تضرب في المليان".
وكتب زيدان: "صديقي الزملكاوي الجامد جداً المخرج الكبير عمرو سلامه .. يضرب في المليان".
ويأتي تعليق زيدان ليؤكد على حالة القلق المتزايدة بين جماهير ومحبي نادي الزمالك بشأن مستقبل أحد أهم لاعبي الفريق، أحمد سيد "زيزو"، الذي يقترب عقده من نهايته دون إعلان رسمي عن تجديده.
وتعكس رسالة عمرو سلامة، التي حظيت بدعم زيدان، مطالبة صريحة من أحد الشخصيات البارزة والمؤثرة بين مشجعي الزمالك، بضرورة تحرك مجلس الإدارة بشكل حاسم وسريع لحسم ملف تجديد عقد زيزو والحفاظ على استقرار الفريق.
رسالة سلامة الي مجلس ادارة الزمالك
ووجه عمرو سلامة عدة نصائح للاعب الزمالك أحمد سيد زيزو أبرزها ضرورة شعوره بالفخر تجاه نفسه، لافتًا إلى أنه من الهدافيين التاريخيين للزمالك، ولديه أرقام مميزة محليا وإفريقيًا .
ووجه سلامة رسالة إلى زيزو قائلا: لازم تكون حاسس بفخر كبير. آه، رقميًا أنت من هدّافي الزمالك التاريخيين، وأرقامك مميزة وقياسية، لكن أظن الرقم القياسي الأهم هو عدد الساعات الإعلامية، وعدد نقاشات القهاوي والكافيهات، وعدد البوستات اللي على السوشيال ميديا، اللي الناس كلها كانت بتتكلم فيها عنك".
وتابع سلامة “في آخر ست شهور، موضوع التعاقد مع زيزو كان نقاش متكرر أكتر من مواضيع في السياسة، والأحداث الإقليمية، والاقتصاد، والفن. ماعتقدش إن في لاعب في تاريخ مصر حصل له كل ده. آه، كان في لعيبة ليهم لحظات مشابهة، لكن مش بنفس الزخم ده. لدرجة إن الزمالك والأهلي نسيوا إن الاتنين الاحتمال الأقرب مش هياخدوا الدوري السنة دي، وتحول انتصار الموسم ليهم هو “مين هيمضي زيزو”، وكأن اللي كسبك كسب الدوري. كمان من مميزاتك إنك لاعب أغلب جماهير الفرق التانية ما بتكرهكش. عمرك ما كنت مستفز، ولا أخدت موقف عدائي، ودي ميزة نادرة في الكورة”.
وأوضح “بس للصدق، أنا كمشجع، ولإني ماعرفكش على المستوى الشخصي لسة للأسف، فحبّي ليك مشروط بإنك زملكاوي. ولو رحت الأهلي، أكيد هتكون فيه مشاعر غضب وإحباط. وبسبب سذاجة المشجع الطبيعية، مش هفكر بقى في الاحترافية، ولا هقدر أستوعب إنك بتدور على مستقبل أفضل. ساعتها هشعر إنك خنتنا، وأعتقد ده هيكون شعور أغلب الزملكاوية. بعد ما كنت معشوق جماهير فريقك، وتحترم من المنافس، هتبقى محبوب من جماهير الفريق الجديد، لكن مكروه بشدة من جمهورك الأصلي، خصوصًا بعد كل الجدل اللي حصل والمكايدة السودة المهببة اللي هتحصل. آه، من حقك تشوف مصلحتك، وتأمّن مستقبلك، وتطمع في اللي شايف إنك تستحقه. بس مشجع الكورة عاطفي، ومش كمان في الكورة مطلوب منه يفكر بعقلانية أو منطق”.
واختتم: "وواقعيًا؟ خليك في الزمالك يا زيزو. ملك في قرية، خير من أمير في مدينة… آه احنا بالمقارنة قرية، بس قرية أهلها طيبين وحمولين وصبورين وحتى بنعمل ساعات من الغلابة رموز، إنما المدينة زحمة وعندها بدل الموهبة مية واقفين طابور، وما بترحمش، وما بتصبرش، ومابتسامحش، لأنها دايمًا فوق الجميع".
