تووليت يعلق على تأجيل حفله في الأرينا : كل تأخيرة وفيها خيرة
خرج مطرب الراب تووليت، للتعليق على تأجيل حفله في الأرينا بالقاهرة، والذي كان من المقرر له الأمس الجمعة.
تووليت يعلق على تأجيل حفله في الأرينا
وأكد تووليت في فيديو له عبر ستوري إنستجرام، أن الحفل تأجل بسبب ظروف خارجة عن إرادته لا يستطيع كشفها للجمهور.
ظروف خارجة عن إرادتي
وقال تووليت : "إزيكم أتمنى تكونوا بخير جميعًا .. أول حاجة حابب إن أنا أتأسف على تأجيل الحفلة .. بسبب ظروف خارجة عن إيدي وإرادتي تماماً .. وياريتني كنت أقدر أشارككم الظروف دي وأحكيلكم لكن الحمد لله على كل شئ".
حاولنا بأقصى جهد أنا وفريقي إننا نخلي الحفلة في ميعادها
وتابع : "صدقوني من أول ما عرفنا إن الحفلة مش هتتعمل حاولنا بأقصى جهد أنا وفريقي إننا نخلينا في ميعادها وتتعمل .. لكن ربنا مايسرش الأمور والحمد لله على كل شيء .. كل تأخيرة وفيها خيرة .. أنا عارف قد إيه الموضوع صعب ومش لذيذ .. على إن في ناس كانت مسافرة وناس كانت باذلة مجهود كبير أوي وناس مرتبة يومها علشان تشوفني".
وأكمل تووليت : "صدقوني الموضوع ده زيي زيكم كان نفسي إن أنا أشوفكم واحد واحد واتبسط بالحفلة .. بالذات إن الحفلة دي في بيتي في القاهرة مع أعز جمهور عندي .. لكن الحمد لله والحفلة ماتلغتش لكنها اتأجلت .. وإن شاء الله هتتعمل وهتبقى أحسن بكتير .. وأكيد ربنا مدبر يوم أحلى بكتير أوي لينا .. أشوفكم على خير إن شاء الله وأقولكم قريب على الميعاد الجديد .. وأتمنى لكم كل جديد يارب".
تووليت يكشف عن إمكانية استرجاع ثمن تذكرة الحفل
كما أشار تووليت في ستوري أخرى عبر إنستجرام كذلك أنه يمكن استرجاع ثمن تذكرة الحفل أو الانتظار لتحديد موعد الحفل الجديد، حيث كتب : "وطبعاً للحابب يسترجع التذكرة و ياخد فلوسه بالكامل ده هيبقي متاح .. واللي لسا حابب يجي التذاكر هتفضل سارية لمعاد الحفلة الجديد".
