البيدوفيليا تطور لزواج القاصرات.. إيناس عز الدين تثير الجدل
أثارت المطربة إيناس عز الدين الجدل، وذلك بعدما نشرت مقطع فيديو توضح به أن ظاهرة الاعتداء على الأطفال موجودة منذ قديم الأزل، وذلك عبر حسابها الرسمي على موقع تبادل الصور والفيديوهات إنستجرام.
البيدوفيليا تطور لزواج القاصرات
وقالت إيناس عز الدين في هذا المقطع: “أنا جاية أثير الجدل، بس واللهي مش عن قصد، أكتر ما انا عايزة أقولكم البيدوفيليا مش حاجة جديدة علفكرة، الناس اللي متفاجئة أوي من هوجة الاعتداءات على الأطفال وعاملين يقولوا من أمتى ده بيحصل، علفكرة ده كان بيحصل من زمان للأسف وبشكل مقنن، وبشكل شرعي ورسمي تحت مسمى الزواج، زواج القاصرات في الأرياف والصعيد وأماكن كتير، كنت تلاقي الراجل من 30 سنة بيتجوز طفلة عندها 10 سنين، تحت مسمى أنه بيتجوزها لأنها قطة مغمضة، لكن الواقع أن مافيش راجل عاقل بالغ رشيد ممكن يبص لطفلة صغيرة، ويقول لأهلها أنا عايز اتجوزها، فلو جينا نبص للموضوع هنلاقي أنه موجود منذ قديم الأزل، لولا أنه بقى في قوانين وبيتبلغ عن أي حالة، وبقى بيتم اتخاذ الاجراءات القانونية”.
“البنت مش عار”
واستكملت إيناس عز الدين حديثها قائلة: “الواقع أن في أهالي كتير مشاركة أن بناتها يتمارس عليهم البيدوفيليا، هل طبيعي أن راجل بالغ عاقل يبص لطفلة لمجرد أنها بلغت، أيه هيغريه فيها عشان يتجوزها، البيدوفيليا موجودة من زمان ولكن دلوقتي ظهرت بطرق فيها سرقة لأنها مبقتش متاحة زي زمان، في أهالي كتير بيشوفوا أن البنت عار ومادام بلغت نجوزها، بدل ما نؤدها زي زمان نجوزها، بس البنات مش عار”.
أزمة إيناس عز الدين مع والدتها
في سياق منفصل، قد ألمحت المطربة إيناس عز الدين لأزمتها مع والدتها، في منشور غامض كتبته عبر حسابها بموقع التواصل الإجتماعي فيسبوك، حيث كتبت إيناس عز الدين: “فيه واحدة قسما بالله لو جه يوم وطلعت تتكلم على السوشيال ميديا هتحلفوا بحياة أم شيماء وتقولوا دي كانت نسمة وملاك جنبها وصوت أم شيماء وكلامها اللي معصبكم ومنرفزكم ده هيبقى على قلوبكم زي العسل قصاد اللي هتسمعوه لدرجة هيجيبلكم بانيك اتاك”.
