اتفاجئت إنك بتشتمني ومش هسيب حقي .. أزمة بين حلمي عبدالباقي ومصطفى كامل
شن الفنان حلمي عبدالباقي هجومًا على الفنان مصطفى كامل، نقيب المهن الموسيقية، مشيرًا إلى أنه تفاجأ بتسجيل صوتي لمصطفى وهو يهينه به، مؤكدًا أنه لن يترك حقه.
حلمي عبدالباقي يتحدث عن دوره في النقابة
وقال حلمي خلال فيديو له عبر حسابه الشخصي على فيسبوك : “أنا بقولكم في ناس لما تيجي تتكلم مش بتاخد فرصة تماماً .. وأنا بسأل الجمعية العمومية هل حلمي عبدالباقي في يوم أثر مع حد ؟ .. هل حلمي عبدالباقي شايفينوا أنه ماكنش بيشتغل .. دنا من أيام نقابة هاني شاكر وأنا ماسك لجنة الخدمات .. والناس أكيد مش ناسية أنا كنت بعمل إيه أيام الكورونا .. وكنت عامل بروتوكولات مع جميع المستشفيات والمراكز .. واعتقد كان شئ محمود .. ومأثرتش مع حد أبدًا سواء أعرفه أو معرفوش”.
وتابع : “كان أي حد بيعترض على أي حاجة بيتم اعتباره متآمر وبيزايد .. واعترضت على قرار النقابة بإلغاء التعامل بالواتساب مع الحالات وقت فيروس كورونا .. وقولت ليه الناس تنزل من بيوتها وتركب مواصلات علشان العلاج .. واتهمت وقتها إني بزايد .. وكنت بتكلم عادي في مصلحة الناس .. وبعد أيام الناس اتكلمت كتير فا اتلغى القرار ”.
هجوم حلمي عبدالباقي على مصطفى كامل
وواصل حلمي عبدالباقي ملحمًا في حديثه إلى مصطفى كامل : “أي اعتراض مني كان بيعتبر مؤامرة وهدم للنقابة .. وآخر حاجة بقولها أني بعد كل اللي عملته في النقابة وخدمتي لكل الناس أنا سعيد بده على فكرة .. اتفاجئ بتسجيل صوتي بتهان فيه وبتشتم فيه بكلام صعب يتقال عليا .. لأنك عارف إن أنا جدع وراجل ومش جبان لما وقفت معاك ساعة الانتخابات .. وايه اللي هيخليني اتغير وأنك تسمع لناس بتقول إني بعمل كده علشان عايز أبقى نقيب”.
مش هسيب حقي
واختتم : “للأسف الشديد أنت سمعت واتعاملت معايا على هذا المنطق .. وأنا راجل محترم وليا أسرة محترمة .. ولما يسعموا الكلام ده على أبوهم المحترم اللي رباهم أحسن تربية يعملوا إيه .. بس أنا عايز أقولك إني مش هسيب حقي .. أنا لو سيبت حقي يبقى أموت أحسن .. والأيام اللي جاية هتبين كل حاجة”.
