أسما شريف منير تحتفل بعيد ميلادها الـ 38: اتعلمت 38 حاجة

تحتفل اليوم الفنانة أسما شريف منير، بعيد ميلادها الـ 38، وذلك من خلال مجموعة صور لها عبر حسابها الرسمي على موقع تبادل الصور والفيديوهات إنستجرام، وعلقت على هذا المنشور بـ 38 درسا استفادت به خلال حياتها.

أسما شريف منير تعلمت 38 شئ طوال حياتها

وعلقت أسما شريف منير على الصور قائلة: “انهاردة مش مجرد رقم جديد .. النهاردة وقفة مع نفسي ..  وبصّة ورا على كل خطوة .. كل خُسارة .. كل ضحكة .. وكل دمعة .. عدّيت على حاجات كتير .. اتكسرت واتلمّيت .. اتحبيت واتخذلت .. وقعت وقومت .. لكن فوق كل ده .. اتعلمت .. ٣٨ سنة .. و٣٨ حاجة اتعلمتهم .. خلوني أبقى النسخة دي منّي”.
وتحدثت عما تعلمته قائلة: “اللي بيسيبك وقت ضعفك ما يستحقكش وقت قوتك .. الحب لوحده مش كفاية، لازم احترام وأمان ونية صافية .. مفيش أغلى من راحة البال .. الحدود مش قسوة، دي حب لنفسي .. كل اللي حصل كان لازم يحصل عشان أوصل للي أنا عليه دلوقتي .. الكتم مش قوة دايمًا، أوقات لازم أتكلم .. الجمال الحقيقي جوايا مش في مراية ولا كاميرا .. الناس بتتغير، وأنا كمان. وده طبيعي .. ربنا عمره ما خذلني، حتى في أسوأ أيامي .. السُكوت مش دايمًا رضا، أوقات بيبقى وجع .. اللي بيحبك بجد هيخليكي تحسي بالأمان مش التوتر .. اتعلمت أقول لأ من غير ما أبرر .. في حاجات كتير فقدتها، بس كسبت نفسي .. المغفرة مش معناها أرجّع الناس لحياتي، معناها أحرر قلبي .. مش لازم أكون كاملة عشان أكون كفاية .. الوقت بيكشف، والنية بتبان .. مفيش صدفة، كله ترتيب إلهي .. الكتابة أنقذتني .. لما بحب نفسي، كل حاجة حواليّ بتتغير .. مش لازم أرد على كل حاجة .. اتعلمت أسمع صوتي قبل صوت الناس.”.

واستكملت عما تعلمته: “كل ما كنت حقيقية، كل ما ارتحت أكتر .. اتعلمت أقول “أنا تعبانة” من غير خجل .. العلاقات مش كلها للأبد، بس كلها دروس .. أتقبل التغيير، حتى لو وجعني .. اللي راح مكانش ليّ، واللي جاي أحلى بكتير .. لما بنضف قلبي، الدنيا بتنضف معاه .. مش لازم كل حاجة تتقال. في حاجات بتتحس بس .. الصوت اللي جوايا أهم من أي رأي خارجي .. مش دايمًا الصح واضح، بس الإحساس بيقول .. اللي بيحسسني إني مش كفاية، ملوش مكان .. الأمان الحقيقي في حضن ربنا .. مش كل حاجة لازم أفهمها دلوقتي .. في أوقات لازم أختفي عشان أرجع قوية .. النجاح مش شهرة، النجاح سلام داخلي .. اتعلمت أكون لنفسي اللي كنت مستنياها من الناس .. لما ببطل أقاوم، الحياة بتسوقني للأحسن .. أنا لسه بتعلم، ولسه قلبي مفتوح لكل جديد”.