عمرو سلامة يكشف نصائحه لمتابعيه في التمثيل والكتابة والإخراج
كشف المخرج عمرو سلامة عن نصائحه لمتابعيه الذي يرسلون إليه رسائل من أجل فرص عمل في مجالات التمثيل والكتابة والإخراج، مؤكدًا أن يشعر بتأنيب الضمير لعدم استطاعه الرد على كل الرسائل.
عمرو سلامة يتحدث عن رسائل متابعيه
وكتب عمرو عبر حسابه الشخصي على فيسبوك : “والله والله والله ورحمة أبويا الغالي .. ضميري بيأنبني على كل مرة حد يبعتلي طالب فرصة تمثيل .. أو عنده سيناريو .. أو نفسه يشتغل مساعد .. بس لو كرّست حياتي للرد ومساعدة كل حد .. مش هقدر أساعد حتى ١٪ من كمية الرسائل اللي بتوصللي كل يوم”.
مفيش وصفة سحرية تخليك توصل
وتابع : “مفيش وصفة سحرية تخليك توصل .. بس أكيد إنك تبعت رسالة لشخصية عامة بيوصله مئات الرسائل زي رسالتك .. طريقة مش فعالة .. اللي أقدر أساعد بيه هو إني أشارك الطرق اللي شوفت في طريقي ناس بتوصل بيها".
نصائح عمرو سلامة في التمثيل
وواصل عمرو سلامة : “في التمثيل .. خد ورش كتير .. ادخل معاهد .. وما تشغلش بالك بالأجر قبل ما يبقى ليك اسم .. اعمل فيديوهات بفكرة لطيفة تبين موهبتك ونزلها أونلاين .. روح كاستينج كتير .. المهم مش بس الخبرة اللي هتكتسبها من التجارب دي .. المهم العلاقات اللي بتتكون في السكة .. والناس اللي هترشحك .. وإنك تبقى جاهز لحظة ما الفرصة تيجي”.
نصائح عمرو سلامة في الكتابة والإخراج
أما عن الكتابة والإخراج، أكمل : “اكتب أكتر من فيلم .. ما تعتمدش على فيلم واحد .. ابدأ بأفلام قصيرة .. وحاول تنفذها حتى لو مع هواة وبإمكانيات صفرية .. أعمل عشرة أفلام لو تقدر .. إبعتها مهرجانات .. نزلها أونلاين .. لحد ما حد يشوف حاجة ليك تعجبه ويكلمك هو”.
معرفش بداية الطريق منين
وأضاف عمرو سلامة : “في المساعدة .. بصراحة معرفش بداية الطريق فيها منين بالظبط .. بس اللي أعرفه إنها مش الطريق الوحيد للإخراج .. المساعدة شغل إداري أكتر من إنه فني .. لو أخرجت مشاريع صغيرة بنفسك .. هتتعلم أكتر بكتير”.
مش هقدر أقول إن الطرق دي مضمونة 100%
وتابع عمرو : “مش هقدر أقول إن الطرق دي مضمونة 100% .. بس مؤكد إنها أنفع ألف مرة من رسائل عشوائية لحد ما يعرفكش .. عنده تخمة من نفس نوع الرسائل”.
في يوم كنت مكانكم
واختتم عمرو سلامة رسالته للمتابعين : “وبالتوفيق لكل موهوب مجتهد طموح بيحاول يشق طريقه .. في يوم كنت مكانكم .. من غير واسطة ولا أعرف إنسان في الوسط الفني .. ومش عارف أخبط على أي باب .. وزي ما بقول على طول .. خبط على كل باب تشوفه .. بس ماتخبطش على نفس الباب مرتين”.
