صلاح: أشعر بالفخر والأمل في عيون المصريين وهذا يحفزني دائمًا
أكد نجم ليفربول ومنتخب مصر، محمد صلاح، أن جزءًا كبيرًا من نجاحه يعود إلى صدقه الشديد مع نفسه، والتمييز بين الصواب والخطأ، مشيرًا إلى أن هذه الصفة لا يلتزم بها الكثيرون في حياتهم اليومية.
وأوضح صلاح أن الثقة بالنفس والإيمان بالقدرة على تحقيق الأهداف هي أساس كل إنجاز، مؤكدًا أن الطريقة ليست مهمة بقدر تحقيق النتيجة النهائية.
وقال صلاح في تصريحات لقناة أون سبورت خلال حديثه مع السير مجدي يعقوب جراح القلب العالمي: "لازم دايمًا يكون عندي ثقة وإيمان إني هحقق الحاجة اللي أنا عايزها… مش مهم إزاي هتحصل، المهم إنها لازم تتحقق".
وأشار: "أكتر حاجة بتخليني مبسوط في مصر هي نشوف نظرة الفخر في عيون الناس لما يشوفوني، وده بيمنحني شعور كبير بالسعادة".
نصائح صلاح للآباء وأهمية احترام رغبات الأبناء
وشدد صلاح على أهمية دعم الآباء لأبنائهم دون فرض رغباتهم الشخصية عليهم، مؤكدًا أن أي إنسان يجب أن يكون لديه إيمان داخلي لتحقيق أهدافه. وقال: "دايمًا لازم تشوف ابنك عايز يعمل إيه، مش لازم يكون الحاجة اللي أنت عايزها. المهم جدًا أي إنسان يكون عنده إيمان إنه هيحقق هدفه". وأكد أن الشعور بالفخر والامتنان من المصريين يمنحه دافعًا إضافيًا ويجعله يسعى دائمًا ليكون مصدر أمل وفخر للآخرين.
وأشار صلاح إلى تجربة شخصية مع ابنته مكة، حيث كشف أنه كان يتمنى أن تصبح لاعبة تنس، لكنه احترم رغبتها في اختيار الطريق الذي يناسبها. وقال: "كنت عاوز بنتي تلعب تنس، لكن هي مش عاوزة. قعدت مع نفسي وقلت لازم هي تقرر حياتها بنفسها، لكنّي نصحتها بضرورة ممارسة رياضة معينة".
واستكمل: "الأباء عاوزين أبناءهم يكونوا دكاترة أو مهندسين، لكن في الآخر الأبناء هم من يقرروا مصيرهم بإيديهم".
شعور الفخر والراحة في مصر وخارجها
وأوضح نجم ليفربول: "أكتر شيء يبسطني أني أكون في مكان وأحس أني على طبيعتي وأشعر براحتي وأني أشوف أهلي وأبويا وأمي، ولو ما روحتش البلد هما بيجولي لظروف ارتباطي بالمنتخب وعدم وجود وقت لزيارتهم في مسقط رأسي".
واستطرد: "أكتر حاجة بتديني انبساط وتخليني فخور وأنا في مصر اني لما الناس بتشوفني بتتبسط وبحس بنظرة فخر وأمل وده بيديني حافز وبحس اني عملت حاجة كويسة وده حسس الناس أمل وفخر ودايما عايز الإحساس ده يوصل للناس".
وأتم: "مش دايما بشعر بإحساس إني حر من غير ما الناس تطلب تتصور معايا، وبشوف مصريين في أماكن كويسة في إنجلترا ودي حاجة حلوة".
