باسم شادي خفاجة.. إدوارد يعلن عن تعرضه إلي عملية نصب
أعلن الفنان إدوارد عن تعرضه لعملية نصب باسم الفنان شادي خفاجة، وذلك من خلال خاصية الأستوري عبر حسابه الرسمي على موقع تبادل الصور والفيديوهات إنستجرام.
إدوارد يتعرض لعملية نصب
وقال إدوارد في منشوره: “يا جماعة أنا اتنصب عليا في فلوس، الرقم ده بعتلي على أنه شادي خفاجة الممثل، وأنه متعشم فيا، ومافيش شغل، ومش لاقي ياكل، وأنا زي العبيط بعتله فلوس انستا باي، وراح عملي بلوك وكلمنا بعد كده شادي طلع ميعرفش حاجة، خدوا بالكم بقى من النصب باسم الفنانين بقينا في زمن يقرف”.
انتقادات إدوارد وبرنامجه
في سياق منفصل، قد وجهت انتقادات مؤخرًا إلى إدوارد وبرنامج القاهرة اليوم، بعد استضافة عزة، خاصة أن الكثير من رواد السوشيال ميديا رأوا أن القائمين على البرنامج قصدوا إحراج الفنانة التي أدلت بتصريحات غريبة.
تصريحات عزة سعيد مع إدوارد
وأشار البعض أن عزة سعيد تعاني من مرض نفسي، حيث قالت أنها اتفقت على تقديم بطولات في طفولتها على أن يتم تنفيذ تلك المشاريع بعد 20 سنة، كما قالت أن المخرج الراحل يوسف شاهين كان يبحث عنها من أجل العمل معها، واتفقت على 20 فيلم مع المخرج شريف عرفة.
في منشور لمعدة البرنامج شاهندة عز العرب عبر موقع التواصل الاجتماعي "فيسبوك"، أكدت أن الهدف من استضافة عزة كان تكريميًا بحتًا، وأنهم حاولوا تقديم الدعم والمساعدة للفنانين الذين غابوا عن الأضواء لفترة طويلة.
وقالت عز العرب: "أنا وزميلي مصطفى عزت كنا أصحاب فكرة استضافة عزة سعيد، وده بعد ما تعبنا كتير علشان نعرف نوصل لها. كل الفنانين اللي ظهروا في الصور دول، دول تعبنا شغلنا كفريق إعداد وإخراج على مدار السنين. إدوارد هو الأنسب يقدم الفقرة دي لأنه كان بيقدمها بصدق وفعلاً كان هدفه يساعد الفنانين دول ويقدمهم تقديرًا لمسيرتهم الطويلة."
وأضافت: "كفريق إعداد كنا مبسوطين جدًا إننا فكرنا الجمهور بيهم، وكان هدفنا نكرمهم. نحن من بدأنا فكرة تكريم كبار الفنانين، وده كان حاجة أسعدتهم جدًا. بعضهم قال لنا حرفيًا: "أنتم لسه فاكريني؟". وكرمناهم وأهديناهم درع البرنامج، وعرضنا كليبات من أعمالهم. بينما غيرنا كانوا بيجروا ورا أخبار زي عيد ميلاد عمرو دياب أو كيكة دينا الشربيني الذهبية."
وأوضحت: "بالنسبة لإدوارد، هو كان سعيد جدًا إنه هيتكلم مع زميلة فنانة، وكان هدفنا هو إننا نكرمهم، وعندما بدأنا مع عزة كان الكلام طبيعي، لكن لما حسينا إنها بتعاني من مشكلة، خلصنا الفقرة على طول. أما اللي بيقولوا إن البرنامج دفع فلوس علشان نعمل كوميديا أو نعمل ترند على السوشيال ميديا، ده كلام فاضي وده مش مستغرب لأنه بيجي من ناس دايمًا بينظروا لينا وبيقدموا دروس في المهنية، وفي نفس الوقت بيشتمونا في حاجات مش صحيحة. أنا من خلال شغلي في أوربت وبرنامج "القاهرة اليوم" لأكثر من 20 سنة، عارفين إن الكلام ده كله غلط."
