"الحب عنده ساحة نفوذ".. تحليل صادم لشخصية محمد فراج في ورد وشيكولاتة

تحدث خبير العلاقات والصحة النفسية علي موسى، عن دور الفنان محمد فراج في مسلسل ورد وشيكولاتة، محللا شخصية فراج في العمل، وواقعها على الشخص في الحياة المجتمعية.

وقال موسى في منشور له على موقع التواصل الاجتماعي فيسبوك: “محمد فراج في مسلسل ورد وشيكولاتة قدّم شخصية معقّدة جدًا اسمها صلاح واللي من برّا ممكن يبان راجل خائن أو متلاعب لكن الحقيقة أعمق من كده بكتير”.

دور محمد فراج في مسلسل ورد وشيكولاتة

وأضاف أن "صلاح مش مجرد راجل خائن أو متلاعب. ده نموذج كلاسيكي للشخص النرجسي المتعقّد نفسيًا تحديدًا من فئة الVulnerable Narcissist هو طالع من بيئة اتعلم فيها إن قيمته في الإنجاز والسيطرة مش في المشاعر فبقى بيشوف الحب مش كعاطفة لكن كأداة لإثبات الذات محتاج دايمًا يحس إنه مميز ومطلوب وإنه الأذكى في القصة بيهرب من أي إحساس بالعجز أو الضعف عن طريق التحكم في الآخرين وده اللي خلاه يدخل حياة مروة مش بدافع الحب الحقيقي لكن بدافع التحدي هي بالنسبة له اختبار لقوته مش شريكته".

https://www.facebook.com/share/p/1Cr2k2sRGp/

وأوضح أن "الحب عند صلاح هو ساحة نفوذ مش تواصل لما بيحب بيحاول يملك ولما بيخاف يخسر يبدأ التلاعب وعود استعطاف غموض بيحب بس لما الطرف التاني ينسحب لأن الغياب بيستفزه ويدخله في لعبة السيطرة وده نوع من الارتباط القلق المتجنب Anxious-Avoidant Attachment يقرّب لما يحس إن الطرف التاني بعيد ويبعد لما العلاقة تبقى قريبة بزيادة".

وأكد أن "صلاح يعيش صراع دائم بين ضميره وصورته بيبرر خيانته بأنه مضطر وأن ظروفه معقدة بيصدق نفسه لدرجة إنه يتعاطف مع ذاته أكتر من ضحيته وعنده قدرة مدهشة على تجميل أخطائه بالكلام والدوران وده من سمات الSocial Narcissist".

وواصل بقوله: "صلاح مش قادر يحب بصدق لأنه مش متصالح مع نفسه بيعيش في قناع محتاج دايمًا يثبت إنه الأفضل لكنه من جواه هش جدًا وده سبب إنه وقع في فخ الجواز في السر يظن إنه سيطر على كل الأطراف لكنه فعليًا عبد لصورة نفسه اللي عايز يحافظ عليها قدام الكل".

وعقب بقوله: "وده اللي بيخليه خطر جدًا على اللي بتحبه لأنه مش بس بيكسر القلب ممكن يدمر حياة كاملة من كتر التلاعب والتعب النفسي اللي بيسببه العلاقة معاه مش مجرد خلاف أو مشاكل بسيطة دي علاقة مؤذية ومهددة بتستنزف الضحية لحد ما تفقد إحساسها بنفسها".

واختتم بقوله: "وفي الآخر صلاح من النوع اللي بيخسر كل حاجة بإيده كل مرة بيحاول يمتلك بيكسر وكل مرة بيجري ورا الأمان بيصنع فوضى لأنه مؤمن إنه يستحق الحب بدون ما يقدّم تضحية أو مواجهة وده أخطر نوع من الناس اللي يقدر يحبك ويكسرك في نفس اللحظة من غير ما يحس إنه عمل حاجة غلط".