علاقتي بربنا قوية.. دارين حداد لـ نيوز رووم: كنت بشغل سورة البقرة أثناء تجسيد فحيح في المداح 5

كشفت الفنانة دارين حداد كواليس مشاركتها في مسلسل “المداح: أسطورة العهد” بطولة الفنان حمادة هلال، من خلال دور فحيح إحدى بنات إبليس والذي شاركت من خلاله في الموسم الرمضاني 2025.

دارين حداد تكشف كواليس تحضيريها لـ شخصية فحيح

وقالت دارين حداد في ندوة نيوز رووم عن التحضير للشخصية: “اشتغلت على الورق، وبحثت على جوجل علشان أعرف يعني إيه فحيح، كان الموضوع متعب شوية، خاصة أنها شخصية جديدة بتقدم حاجة مفيش مرجعية ليها”.

وأضافت دارين حداد: “لما عرفت إني هقدم ميكب سينمائي رعب فرحت جدًا، هو صعب ولكن بنفس الوقت بيدخلك في الشخصية أكتر، وبمجرد ما المخرج يقول أكشن بنسى الشكل والميكب، لأن فحيح شخصية مش سهلة ومتلونة”.

وتابعت دارين حداد عن كواليس تحضيرها للشخصية: “اشتغلت على الشخصية لوحدي في البيت مازحة”اتلبست في البيت"، وكانت فترة صعبة، لكن بالنسبة لي بحب الأدوار المركبة الجديدة والغريبة عليا ولذلك كنت متحمسة، وسعيدة أني اشتغلت على الشخصية زي ما كنت عاوزة وبتوجيهات المخرج أحمد سمير عاطف".

روحانيتي قوية واللي خالقني أقوى من الكل

وبشأن خوفها من المشاركة في العمل وتجسيد دور واحدة من بنات إبليس، قالت دارين حداد: “لازم تكون علاقتك بربنا قوية، أنا روحانيتي قوية واللي خالقني أقوى من الكل، وكنت بشغل سورة البقرة”.

وأشارت إلى أنها حرصت على أن لا تظهر كواليس العمل لأسرتها، موضحة: “مش بحب أوري الكواليس لأن ده شغلي وبغير عليه، علشان مفيش أي معلومة تتسرب، ولما أهلي اتفرجوا عليا اتخضوا وقالوا بسم الله الرحمن الرحيم”.

وعن إمكانية مشاركتها في الجزء السادس في حال تم التحضير له، قالت: “مفيش حد مبيتمناش يكون في المداح إن شاء الله حتى بمشهد”.