صابرين جابر تكشف لنيوز رووم بين الانبهار والراحة النفسية… الفلتر مش بيكسب!

تقول خبيرة العلاقات الأسرية صابرين جابر، في تصريحات خاصة لـ موقع نيور رووم بين الانبهار والراحة النفسية… الفلتر مش بيكسب!

هو الانبهار بقى يساوي حب؟
ولا الجمال بقى معيار الراحة؟
وتابعت: بصراحة إحنا بقينا نعيش في زمن الصورة مش الإحساس.
زمن الفلاتر اللي بتخلي كل حاجة شكلها كامل بس  من جوه ناقصة جدا.

اللي بيحصل إن أول ما حد يعجبنا بنصدق الإحساس ده على طول.
نقول هو  ده ده مختلف ده مريحني من أول نظره 
بس الحقيقة؟
اللي مريحك مش الشخص دي الصورة اللي رسمها خيالك.
الانبهار دايما ليه إضاءة قوية .
الراجل مثلًا يقولك “أنا بحب البنت الطبيعية 
بس أول ما يشوف واحدة بفلتر وشعر طويل وعيون ملونه ينسى كل اللي قاله ويبدأ يحكي لنفسه حكاية  الراحة النفسية اللي شافها في عينيها هو مش شايف راحة هو شايف فلتر وايديت واكستنيشن وعمليات تجميل ولبس استايل .

والست؟
برضو مش دايما بريئة من اللعبة دي.
تقولك أنا بدور على راجل يطمنني 
بس أول ما تسمع صوت واثق وكاريزما 
تحس بالأمان المؤقت اللي بييجي مع الانبهار مش الراحة.

الفرق بين الاتنين بسيط جدًا بس عميق جدًا:
الانبهار بيحصل مرة واحدة الراحة النفسية بتتأكد كل يوم .
بس تعالوا نواجه نفسنا…
الفلتر مش بيكسب.
هو بيكسب أول خمس دقايق أول إعجاب وأول نظرة.
لكن بعد كده؟
بيخسر لما ييجي الجد لما يبدأ الكلام الحقيقي المواقف الحقيقية التعب الحقيقي.
لما تكتشف إن الصورة اللي كانت مبهراك مش دايمًا شبه اللي جواها.

كم واحد دخل علاقة عشان الشكل وخرج منها متلخبط؟
وكم واحدة اختارت الراحة على الجمال واكتشفت إنها أخدت أجمل قرار في حياتها؟
في الآخر الجمال ممكن يخطف لكن الراحة النفسية هي اللي تخليك تكمل.