مش فبراير بس اللي العالم كله بيحتفل فيه بعيد الحب احنا كمان كمصريين عندنا عيد حب خاص بينا بطريقتنا .
كل سنة يوم 4 نوفمبر المصريين بيحتفلوا بحاجة لطيفة اسمها عيد الحب المصري يوم بنفكر فيه بعض إن الحب مش لازم يبقى بين اتنين مرتبطين يمكن ناس كتير ما تعرفش إن اليوم ده مش صدفة ولا مجرد تقليد لعيد الحب العالمي اللي بييجي في فبراير لأ ده يوم له قصة وله روح مصرية فيها دفء وشجن وذكريات من القلب.
القصة بدأت سنة 1988 لما الكاتب الكبير مصطفى أمين مؤسس جريدة أخبار اليوم كتب مقال بيقترح فيه إن يكون عندنا يوم خاص للحب في مصر كان شايف إن الحب مش بس بين حبيبين لكن بين كل الناس بين الجيران والصحاب والعيلة، وحتى الناس اللي قابلتهم صدفة وسابوا فيك أثر طيب.
الفكرة وقتها كانت بسيطة جدا بس فيها معنى عميق:
ليه نستنى العالم يحتفل بالحب مرة في السنة وإحنا أولى نحتفل بيه على طريقتنا بقلوبنا البيضا و ببساطة ومن غير تكلف؟
يمكن اللي بيميز عيد الحب المصري عن غيره إن مش لازم فيه هدية غالية ولا وردة حمرا ممكن تكون مكالمة لشخص وحشك أو رسالة “أنا مسامحك” هو يوم بيرجعنا للمعنى الحقيقي للحب العطاء والتسامح .
وفي بلد زي مصر اللي رغم كل حاجة لسه الناس فيها بتضحك وتحب وتساند بعض وجود يوم زي ده مش رفاهية ده reminder صغير إن احنا لسه بشر .
فـ لو عدي عليك 4 نوفمبر كده من غير ما تقول كلمة حلوة لحد ارجع بسرعة وابدأها بكلمة بسيطة:
“كل سنة وإنت طيب… عيد حب مصري سعيد ”
