آمال ماهر تكشف مفاجأة : أغنية ياريتك فاهمني كانت بتاعتي قبل أنغام
كشفت الفنانة آمال ماهر مفاجأة، حول أغنية ياريتك فاهمني للفنانة أنغام، حيث أشارت أن الأغنية كانت لها في البداية، قبل أن تذهب إلى أنغام، كما تحدثت عن طريقة تعاملها مع شائعات الزواج التي تطاردها.
آمال ماهر تكشف مفاجأة حول أغنية ياريتك فاهمني
وقالت آمال خلال لقائها في برنامج عندي سؤال، مع الإعلامي محمد قيس، عبر قناة المشهد : “أغنية ياريتك فاهمني للفنانة أنغام كانت أغنيتي في ألبوم ولاد النهارده .. ولكن جت بعد ما خلصت الألبوم .. وكانت المفروض هتبقى معايا في الألبوم اللي بعده بس مكنش في نصيب .. وكمان أغنية ملهمته الوحيدة لـ أصالة .. وأغنية احتمال وارد لـ سميرة سعيد .. كانوا هيبقوا من ضمن أغاني الألبوم”.
تعامل آمال ماهر مع شائعات زواجها
أما عن شائعات الزواج، أضافت آمال ماهر : “من كتر ما بيتقال عني إني اتجوزت بقيت أزهق إني أرد .. والناس عايزة تعرف عنك حاجات فبتتخيل .. وحياتي الخاصة دايمًا بتثير فضول الجمهور .. بس أنا بحب الهدوء وأتفرج على مسلسل وأشرب قهوة .. ومبحبش الكلام الكتير”.
بداية آمال ماهر مع الغناء
وسبق وتحدثت آمال في نفس الحوار عن أسرار في طفولتها، منها بداية اكتشاف موهبتها الغنائية، كما تحدثت عن مستواها الدراسي، وقالت : "غنيت في طفولتي أرجوك أوعى تغيب .. ووالدي وقتها اتخض وقال لماما إن صوتي حلو .. وبابا كان بيحب يسمع لأم كلثوم ومحمد عبدالوهاب .. وكنت بحفظ كل اللي شغال .. وبابا كان بيقولي غني .. بس الموضوع وقف على كده ".
فشل في الدراسة
وأكملت : "كنت في المدرسة فاشلة بس بمزاجي .. وأخويا كان شاطر واتخرج من صيدلة وكان دايمًا في مرتبة الشرف .. وفي مرة في تالتة ابتدائي سألت أخويا انتا بتذاكر ليه ؟ .. راح قالي علشان مبقاش فاشل زيك والموضوع استفزني .. وفعلا دخلت في مرتبة الشرف".
بكاء آمال ماهر عند الحديث عن والدها الراحل
كما تطرقت في حديثها إلى والدها الراحل، حيث قالت آمال ماهر باكية : "ناقصني والدي ولو كان في حياتي اليوم كانت حاجات كتير اتغيرت .. ووجوده جنبي كان بالدنيا .. وكنت هشكيله همومي .. ووالدي متوفي من 9 سنين .. وحاسة كأنه إمبارح .. دايمًا في حياتي بفتكر مواقف كتير له .. ودايمًا سيرته معايا”.
