الزمالك يقرر إقالة فيريرا من تدريب الفريق وتعيين مدرب مصري مؤقتا (خاص)
قرر مجلس إدارة نادي الزمالك، برئاسة حسين لبيب، توجيه الشكر إلى يانيك فيريرا المدير الفني للفريق عقب تدهور نتائج الفريق في الدوري المصري الممتاز.
وعلم "نيوز رووم" من مصادره أن نادي الزمالك قرر توجيه الشكر إلى يانيك فيريرا مدرب الفريق، وتعيين مدرب مصري مؤقتا لقيادة الفريق في السوبر المصري.
وفتح طارق السيد نجم الزمالك السابق النار على مسؤولي الزمالك وجون إدوارد المدير الرياضي، بسبب استمرار يانيك فيريرا المدير الفني للفريق حتى الآن.
وقال طارق السيد في تصريحات تلفزيونية عبر قناة إم سي مصر 1: "الزمالك عنده مشكلة بسبب المدير الفني اللي موجود.. مينفعش يبقى عندي مدير فني 4 ماتشات في دوري ورا بعض أخسر 9 نقاط من 12 نقطة وأفضل عندي إصرار عليه".
وأكمل: "النادي الأهلي وهنا أنا بشيد بناسه أو بجماهيره أو بإدارته في النقطة دي، اللي هي إيه؟ ريبيرو جه لعب حوالي بتاع 8 ماتشات، لما لقوه مش على قد مستوى النادي الأهلي مشي".
وأضاف: "ومتجيش تقول لي مفيش فلوس، ليه؟ لأن انت السنة اللي فاتت كان عندك جوميز مشي.. جبت جروس ومكنشي معاك فلوس، بعدها بشهر ولا شهرين مشيت جروس وجبت بسيرو، بعد شهر واتنين مشيت بسيرو وجبت أيمن الرمادي، وده كله مكنشي فيه فلوس".
وأضاف: "يعني هي المشكلة مش مشكلة الفلوس، دي مشكلة دماغ ومشكلة تفكير".
وتابع: "جمهور الزمالك كله بيقول لك الراجل وحش، وانت شايف 9 نقاط، انت لو كسبت الـ 9 دول باستثناء ماتش النادي الأهلي كنت زمانك في حتة تانية".
وأوضح "أنا صعبان عليّا جمهور الزمالك، ليه؟ باستثناء ماتش النادي الأهلي، ماتش النادي الأهلي ده خارج الحسابات.. آه أهلي وزمالك خارج الحسابات".
وأردف: "إنما انت لو كسبت 3 ماتشات، 4 ماتشات من الماتشات دي كان بقى عندك 28 نقطة، فرق بينك وبين الأول 6 نقط أو 5 فانت اللي بتضيّع، بتضيّع المنافسة".
واختتم تصريحاته: "إنما انت شايف قدامك الراجل عمال يوقع فيك ومش عايز تمشيه، إنت بتقع، إنت بتعمل نتائج سلبية، إنت عمال تعمل نتائج سلبية وإنت سايب الراجل .. في ظل إن كل مصر بتقول لك الراجل مش كويس".
