محمد سامي: النجاح دوامة لا تنتهي.. واعتزلت لأنني «زهقت»
كشف المخرج محمد سامي عن سبب قراره بالابتعاد مؤقتًا عن الساحة الفنية، مؤكدًا أنه شعر بالملل من وتيرة العمل المتسارعة التي يعيشها منذ سنوات.
وقال "سامي" خلال لقائه مع الإعلامية لميس الحديدي في برنامج "الصورة" المذاع عبر قناة النهار:"أنا اعتزلت لأن أنا زهقت.. أنا في دوامة مش بتخلص، وكل سنة بقول خلاص هوقف مسلسلات وهركز في السينما، لكن برجع أشتغل تاني.. النجاح إدمان وبيزنقك في دوامة مش بتفكّها بسهولة."
وأضاف المخرج أنه معجب كثيرا بطريقة عمل المخرجين طارق العريان ومروان حامد، قائلاً: "عجباني طريقتهم جدًا، بياخدوا وقتهم في الشغل ومش مستعجلين على النجاح، وده اللي نفسي أعمله."
ضغط المسلسلات الرمضانية
واختتم "سامي" حديثه مؤكدًا أنه يسعى في الفترة المقبلة للابتعاد عن ضغط المسلسلات الرمضانية، والتركيز على تقديم أعمال سينمائية تحمل بصمة مختلفة تعبر عن رؤيته الفنية بشكل أعمق.
وفي نفس السياق، كشف المخرج محمد سامي عن كواليس بدايته الفنية وأول أعماله الدرامية.
وقال سامي: "أنا بحس إني أبدعت لما أكون مخلص في شغلي، والإخلاص ده كان سر نجاحي من البداية، حتى في الأعمال اللي مش الأقرب لقلبي كنت بديها كل طاقتي"، وأكد أن التفاني في العمل هو أهم ما يميزه في مشواره الفني.
واستعاد سامي ذكريات أولى خطواته في عالم الدراما قائلاً: "أول مسلسل عملته كان (آدم) مع الفنان تامر حسني، وده كان أول مرة أخرج فيها عمل درامي، وقتها مكنش عندي حرية الاختيار، لكن تامر هو اللي رشحني مشكور ودعمني جدًا، وعمري ما أنسى وقفته معايا".
قناة النهار ليها فضل عليا
وأوضح أن مسلسل "آدم" كان نقطة تحول مهمة في مسيرته لعرضه على شاشة قناة النهار، مضيفًا: "أنا بحب قناة النهار جدًا، لأنها عرضت (آدم) وكانت ليها فضل كبير عليا".
وتابع "سامي" حديثه عن أسلوبه في الإخراج قائلاً: "قبل ما أبدأ أي مسلسل، بتفرج الأول وأحاول أشوف الجمهور عاوز يشوفه إزاي، الناس بتحب طعم البيوت القريبة من القلب، بس النوع ده من الأعمال رغم إني بحبه، بخاف أقدمه علشان ممكن يسقط لو متعملش صح".
واختتم قائلاً:" عملت كده في مسلسل (كلام على ورق) واتمسح بيا الأرض، بس كل تجربة بتعلّمني أكتر عن نفسي وعن الجمهور"، مؤكدًا أن الفشل أحيانًا يكون بداية جديدة للنجاح الحقيقي.
