مافيش كوباية بتتملي فجأة زي ما مافيش مشاعر بتتغير في لحظة كل حاجة جوا الإنسان بتحصل بالتدريج بهدوء كده من غير ما نحس.
كل الم صغير بنسكت عليه كل موقف بنطنشه عشان ما نكبرش الموضوع
كل مرة نحاول نبرر ونقول أكيد مش قصده
هي دي المرات اللي بتزود نقطة جديدة في الكوباية.
في العلاقات مثلا محدش بيبعد من أول خناقة.
اللي بيبعد بيكون جرب كتير.
جرب يتكلم بس كل مرة نفس النتيجة.
مرة يزعلوا ويتصالحوا المرة التانية تسكتي
المرة التالتة تبتدي تحسي إنك بتتكلمي لوحدك والمرة الرابعة خلاص بتسكتي وبتبطلي تعاتبي مش لأنك ماعدتيش بتحبي بس لأنك خلاص تعبتي من المحاولة.
واحدة طول الوقت بتقول إنها محتاجة اهتمام والاهتمام هنا مش رفاهيه بالعكس دي مشاعر تحسسها إنها مهمة.
هو بيسمعها يقول حاضر وبعدين ينسى تعدي الأيام وهي بتتألم في سكوت
وفي يوم تلاقي نفسها مش مستنية مكالمته زي الأول مش بتزعل لو ما سألش بتتفرج على العلاقه وهي بتنهار
ساعتها الناس تقول “هي اتغيرت” بس الحقيقة إنها ما اتغيرتش هي بس الكوبايه عندها اتملت .
وفي مثال تاني شاب كان دايما بيحاول يرضي كل مرة يتقال له أنت مقصر يعمل المستحيل عشان يثبت العكس لكن مهما عمل مافيش تقدير.
وفي كل مرة يسمع كلمة تقلل منه يحط نقطة جديدة في كوبايته
وفي يوم من الأيام من غير اي كلام ولا انه يعمل دراما يبطل يحاول.
مش لأنه بطل يحب بس لأنه خلاص تعب وكوبايته اتملت .
الناس بتشوف اللحظة الأخيرة بس ماحدش شاف اللحظة اللي حد فيها قال كفايه أو مش قادر.
مافيش كوباية بتتملي فجأة هي بتتملي بالاهمال وبالتنازلات وبالوجع اللي ما اتقالش.
بتتملي كل مرة بنعدي فيها ونسامح من غير ما نحافظ على نفسنا لحد ما نوصل لمرحلة بنسكت مش عشان الوضع اتصلح
لكن عشان ماعادش في طاقة نحكي تاني.
الوجع الحقيقي مش في النهاية نفسها لكن في الطريق اللي وصلنا ليه في كمية المرات اللي قلنا فيها يمكن المرة الجاية تبقى أحسن.
النهاية مش لحظة…
هي تراكمات تعب وصبر ووجع صغير بيتجمع مع بعض ساعات الحب بيكون لسه موجود بس الألم اللي حسيته بقى أكبر منه
وساعات البعد مش عقاب هو بس شكل من أشكال الحفاظ علي نفسنا
زي الكوباية اللي بتتملي نقطة بنقطة لحد ما تيجي نقطة بسيطة جدا هي اللي تخليها تتملي وكمان بتفيض.
بس الحقيقة مش النقطة دي السبب لا اللي قبلها هو اللي كان بيملي من غير ما حد ياخد باله ده بالضبط اللي بيحصل جوانا.
اللي بيدمرنا في الآخر مش الموقف الأخير
اللي بيدمرنا هو كل اللي عدي واتسكت عليه.
فخد بالك من الكوباية بتاعتك ما تستناش لحد ما تفيض فضيها أول بأول بشويه صراحه او بمواجهة أو حتى انك تبعد شويه في الوقت الصح .
عشان متجيش في يوم وتلاقي نفسك اتمليت مرة واحدة ومش قادر تكمل لان كوبايتك ببساطه اتملت .
