"هنخرج فين النهاردة ؟" .. أفكار لخروجات العيد بأسعار مناسبة

مع بداية إجازة عيد الفطر 2025، ناس كتير بتدور على أماكن حلوة للخروج والاستمتاع بالعيد في القاهرة الكبرى، خصوصًا الأماكن اللي تكون أسعارها مناسبة وتوفر جواً ممتعاً للعيلة والأصحاب.

القاهرة مليانة أماكن سياحية وأثرية، بجانب الحدائق العامة والمتنزهات اللي بتكون وجهة أساسية خلال الأعياد.

 وفي التقرير ده، يقدم «نيوز روم»، مجموعة من أفضل الأماكن للخروج في العيد بأسعار رمزية.

 ممشى أهل مصر وكورنيش النيل

لو عاوز تستمتع بجولة جميلة على النيل من غير ما تدفع فلوس كتيرة، كورنيش النيل هو الاختيار المثالي، لأن الجزء العلوي منه مجاني تمامًا، أما لو حابب تدخل ممشى أهل مصر الجديد، فالتذكرة بـ20 جنيه بس، وده ممتد من كوبري أكتوبر لحد كوبري إمبابة، وبيوفر تجربة فريدة وسط أجواء نيلية رائعة.

حدائق القاهرة بأسعار رمزية

القاهرة فيها مجموعة حدائق جميلة مناسبة للخروجات العائلية بأسعار مخفضة، زي:

الحديقة اليابانية في حلوان.. تذكرتها تبدأ من 10 جنيهات بس.

الحديقة الدولية في مدينة نصر.. وسعر الدخول 10 جنيهات برضو.

أماكن هادية وخضرة واسعة تقدر تستمتع فيها بيوم مميز مع الأسرة أو الأصحاب.

برج القاهرة.. إطلالة بانورامية على العاصمة

من خروجات العيد مميزة، برج القاهرة، فلو حابب تشوف القاهرة من فوق، برج القاهرة هو المكان المثالي، لأنه بيتكون من 16 دور وبيوفر إطلالة بانورامية من خلال المنظار المكبر، والبرج موجود في جزيرة الزمالك، وبيفتح أبوابه من الساعة 9 صباحًا لحد 1 بعد منتصف الليل.

المتحف القومي للحضارة.. تجربة تاريخية ممتعة

واحد من أهم المعالم السياحية في القاهرة، بيقدم تجربة فريدة لمحبي التاريخ، وسعر التذكرة:

80 جنيهًا للمصريين، و40 جنيهًا للطلاب.

500 جنيه للأجانب والعرب.

المتحف بيفتح أبوابه من 9 صباحًا لحد 5 مساءً، وبيضم مقتنيات أثرية نادرة بتاخدك في رحلة عبر الزمن.

القرية الفرعونية.. رجوع بالزمن للحضارة المصرية

في القرية الفرعونية، هتشوف ناس حقيقيين لابسين زي الفراعنة وبيجسدوا الحياة القديمة، بالإضافة لنسخة طبق الأصل من مقبرة توت عنخ آمون ومعبد حجري كبير، مواعيد العمل من 9 صباحًا لـ7 مساءً، وأسعار التذاكر بتختلف حسب الجولة، لكن الأطفال من 3 لـ5 سنين بـ60 جنيه، ومن 5 لـ10 سنين بيحصلوا على خصم 20%.

متحف النسيج المصري.. رحلة وسط أقمشة الزمن الجميل

موجود في شارع المعز، وبيضم مجموعة نادرة من الأقمشة التاريخية، بما فيها كسوة الكعبة المشرفة اللي كانت بتتعمل في مصر في عهد الملك فاروق.

فاميلي بارك.. ترفيه للأطفال والكبار

من أفضل أماكن الخروج للأطفال والعائلات، لأنها بتوفر مساحات ضخمة للعب والأنشطة الترفيهية، زي السفاري، المراكز الثقافية، حديقة الحيوان، الملاعب المفتوحة، والمطاعم. المكان موجود على طريق السويس قريب من مدخل الرحاب.

ذا بلاتفورم.. خروجة شبابية على النيل

مكان مميز في المعادي بيضم مجموعة من المطاعم والكافيهات المطلة على النيل، بجانب ألعاب ترامبولين ومساحات مفتوحة للتزلج. الدخول مجاني، والأسعار بتختلف حسب المكان اللي هتقعد فيه.

جزيرة المعادي.. تجربة ترفيهية متكاملة

لو عاوز قضاء يوم ممتع وسط النيل، جزيرة المعادي هي المكان المثالي، لأنها بتوفر أنشطة متنوعة زي:

العروض المسرحية الحية.

التنزه في مشتل عصفور الجنة.

تناول الغداء في مطاعم راقية مطلة على النيل.

الاستمتاع بحمامات السباحة.

عيد الفطر في مصر تجربة لا تفوت

العيد مش بس جو روحاني وبهجة، لكنه فرصة كمان إنك تستمتع بوقت جميل مع أهلك وأصحابك، والقاهرة فيها اختيارات متنوعة تناسب كل الميزانيات، سواء بتحب التاريخ، الطبيعة، أو الأجواء النيلية، دلوقتي، مش فاضل غير إنك تختار المكان المناسب وتبدأ رحلة الاستمتاع بالعيد.