بعد عام على وفاته .. ماس محمد رحيم تطرح أغنية ضيعتني من كلمات وألحان والدها
طرحت المطربة الشابة ماس محمد رحيم، عبر قناتها على يوتيوب، أولى أغاني ألبومها الجديد، والتي تحمل عنوان "ضيعتني"، وذلك بعد أقل من عام على وفاة والدها، حيث رحل عن عالمنا يوم 23 نوفمبر 2024.
تفاصيل أغنية ضيعتني لـ ماس محمد رحيم
أغنية ضيعتني، تأتي من كلمات وألحان الموسيقار الكبير الراحل محمد رحيم، توزيع موسيقي ومكس وماستر كريم أسامة، جيتار مصطفى أصلان، وإنتاج شركة ديجيتال ساوند.
حديث ماس محمد رحيم عن أغنيتها ضيعتني
وكشفت المطربة ماس محمد رحيم عن مفاجأة خاصة بأغنية ضيعتني، حيث قالت في تصريحات لها : “والدى الفنان محمد رحيم هو اللى اختار لي أغاني الألبوم ومن بينها أغنية ضيعتني .. وهي قريبة جدًا من قلبي .. ولحنها مفاجأة فهو قديم .. لحنه والدي في سن الشباب .. واللحن موجود فيه إحساسه وتركيبته المعروفة في الألحان”.
وتابعت : “والدي كان حريصًا على عمل كل أغنية في الألبوم حالة خاصة وشبهي .. وشايف إن أنا بس اللى هقدر أقدمها بشخصيتي وبطريقتي وبأسلوبي .. وده طبعا زى ما اتعودنا منه .. مع اكتشافه لأي موهبة جديدة .. بيرسم لها طريقها في الغناء .. وأمثلة كثيرة قدمها بالشكل ده ومنهم الفنانة روبي”.
وأضافت ماس محمد رحيم : “اختارنا سوا أغنية ضيعتني .. وهي شبهى زي ماكان بيقول .. والأغنية مش حزينة ومعناها جميل .. وتتخطى حاجز العنوان .. وكل أغنية فى الألبوم لها قصة وشخصية وموضوع مختلف .. وأنا بقدم الألبوم بكل فخر مش علشان نفسي .. ولكن علشان والدي .. لأن انا شايفة اللى قدمه رحيم مش قليل .. لأنه قدر يغير شكل الموسيقى فى الوطن العربى على مدار 30 عاماً”.
وأردفت ماس : “أنا بدأت حب الموسيقى وعمري 5 سنين .. وكنت بحس بوالدي والأجواء اللي كلها مزيكا .. ده غير الجينات اللي توارثتها عنه .. وكنت بكتب وألحن .. وكان والدى بيسمعني وبيعجب بيا .. ولما وصلت إلى 8 سنين بدأت أركب الهارموني لوحدي .. تركيب الهارموني في الموسيقى هو فن تنسيق الأصوات المختلفة معًا في وقت واحد لخلق تأثير موسيقي متناغم”.
وواصلت : “الموضوع ده لفت انتباهه جدًا وعرف إني موهوبة .. وبدأ في تبني موهبتي بتعليمي العزف على الآلات الموسيقية مثل البيانو والجيتار .. وكنا بنتكلم مع بعض بلغة المزيكا .. لو هو عاوز يوصل لي إحساس معين أو العكس لو أنا عاوزة أوصل له إحساس خاص .. كنا بنغنى لبعض .. كان صديقى وصاحبي وكان معايا في كل حاجة”.
واختتمت ماس محمد رحيم : “أنا شايفة التأثير اللي عمله رحيم لازم يستمر ويفضل موجود .. ونسمع منه الجديد .. اللي احنا عرفناه من أعماله نزل .. لكن لسه في كمان حاجات ومفاجآت كتيرة .. الناس لسه ماتعرفهاش هتنزل مع الوقت .. موهبته الفنية بتتعدى الوصف .. حياته كلها مزيكا وأنا بالتبعية غصب عنى إتأثرت بيه جدًا .. والناس كلها بتقول إني شبه والدي .. من وأنا صغيرة بذاكره .. وكل تفاصيله كانت ملهمة بالنسبة لي .. ورسالته وطريقة تعبيره عن نفسه كانت بتبهرني وبتخطفني .. ومن غير ما أحس مشيت في طريق المزيكا بالفطرة .. شرف كبير ليا وباحمد ربنا كل يوم إنه خلاني بنته وخلاه أبويا .. وأتمنى إن أغنية ضيعتني وجميع أغنيات الألبوم اللى هتنزل تعجب الجمهور".
