تحب العدية كاش ولا إنستاباي.. كيف يحتفل المصريون بعيد الفطر؟

يستقبل المصريون عيد الفطر المبارك بفرحة غامرة تنعكس في أجواء البهجة التي تملأ الشوارع والبيوت، حيث تبدأ الاحتفالات من الساعات الأولى لصباح العيد بصلاة العيد في المساجد والساحات الكبرى، وسط تكبيرات تعلو بالأمل والسعادة وبعد الصلاة، تجتمع العائلات على موائد الإفطار التي تتزين بالكعك والبسكويت، وهي عادات متوارثة تعكس روح المحبة والترابط بين الأجيال.

ولا تكتمل فرحة العيد دون زيارة الأهل والأقارب، حيث يتبادل الجميع التهاني والعيديات التي تُدخل السرور إلى قلوب الصغار قبل الكبار. كما تشهد الحدائق والمتنزهات ازدحامًا بالأسر التي تخرج للاستمتاع بأجواء العيد، بينما تزدهر الأسواق والمحال التجارية بحركة نشطة تعكس فرحة العيد في عيون المصريين.

ويظل عيد الفطر مناسبة تجمع بين الفرح والدفء العائلي، حيث تعكس هذه الاحتفالات روح التكافل والتآخي التي تميز المجتمع المصري، ليبقى العيد دائمًا رمزًا للفرح والتلاحم الاجتماعي.

وفي السطور التالية نرصد لكم نموذجاً من احتفالات المصريين بعيد الفطر المبارك 2025. 

العيد بالنسبالي يوم اللم

وقالت منة 14 سنة: "أنا العيد بالنسبالي يوم ‘اللم’... أقولك ليه؟ عشان بلم العيديات من هنا وهناك. بروح لتيتا، خالي، عمتي... لحد ما شنطتي بتتقفل لوحدها من كتر الفلوس. العيدية كاش يعني أشم ريحة العيد فعلاً، أما إنستا باي... ده مش عيدية، ده كأنك بتقوليلي ‘روحي اشتغلي وجيبي فلوسك بنفسك!’". 

يوم العيد هو يوم العيلة 

وقالت هالة 19 سنة: "أنا العيد بالنسبة لي يوم الجري بين بيوت العيلة عشان ألحق أكتر عيديات ممكنة! كاش طبعًا، لإن إنستا باي ده ممكن ييجي وأنا نايمة، يضيع مني وأنا مش دريانة!". 

بصور الكحك بتاع تيتا وأرفعه على الإنستجرام

وقال زياد 12 سنة: "أنا في العيد أول حاجة بعملها إني بصور الكحك بتاع تيتا وأرفعه على الإنستجرام، لازم الناس كلها تشوف! العيدية؟ بصراحة إنستا باي أسرع وأريح، أهو في ثواني ألاقي الفلوس جات على موبايلي وأروح أشتري جيم جديد أو كوينز في اللعبة اللي بلعبها". 

العيدية تيجي إنستا باي

وقال ياسين 18 سنة: "أنا مش بحب أمسك فلوس في إيدي كتير، أفضل إن العيدية تيجي إنستا باي، أسرع وأضمن، خصوصًا إني كل عيد لازم أشتري حاجات أونلاين. تكنولوجيا بقت جزء من حياتنا، وده حتى بيخليني أقدر أتعامل مع العيديات وأنا قاعد في البيت أتابع العروض على اللاب."

العدية كاش

وقال يوسف 16 سنة: "في العيد بروح أخرج مع أصحابي بعد ما نصلي العيد. العيدية؟ بصراحة كاش أحسن! بحس إن فرحتها أكتر لما تبقى فلوس بتمسكها بإيدك، لكن لو جات على إنستا باي مفيش مشكلة."

وقالت مريم 18 سنة: "العيد بالنسبة لي يعني زيارة العيلة والأهل. بحب أقضي وقت مع قرايبي ونلعب مع بعض. بالنسبة للعيدية، بصراحة أنا بحب العيدية الكاش أكتر، لكن ممكن أقبل إنستا باي لو الظروف مش سامحة نلتقي". 

العيد لسه فيه حلاوته القديمة

وقال محمود 23 سنة: "بحب أقضي العيد مع أصحابي، بنروح المتنزهات أو بنسافر يومين لو نقدر. أما العيدية، بصراحة بحبها كاش، بتحسسني إن العيد لسه فيه حلاوته القديمة. لكن لما ماما أو بابا يبعتوا لي العيدية إنستا باي عشان مش فاضيين، مش بمانع."

وقالت مريم، 16 سنة: "العيد بيبدأ عندي لما ندخل بيت تيتا وتبدأ توزع علينا الكحك، وتقول لجدو: ‘ده آخر عيدية هتديها، كفاية!’ وجدو يضحك ويقول لي: ‘تعالي يا مريم، دي عيديتك من غير ما تيتا تعرف’. بصراحة، العيدية كاش ليها طعم خاص، أما لو جالي تحويل إنستا باي من تيتا، هبقى عارفة إن فيه حاجة غلط، عشان تيتا نفسها مش بتعرف تبعت مسج!"

وقالت مايا ١٣ سنة: "العيد بالنسبة لي هو فرصة أصور وأعمل محتوى جديد للإنستا واليوتيوب. بنعمل فيديوهات عن تجهيزات العيد وكحك تيتا، وكل الناس تتفاعل. العيدية؟ بصراحة، إنستا باي أحسن بكتير، تلاقي الفلوس جات على طول وأنا قاعدة أصور. كده أشتري اللي محتاجاه من غير ما حد يشوفني!".