منة فضالي تكشف مفاجآت في نيوز رووم: "مش هتجوز تاني ورافضة أجمد بويضاتي وندمت على التبني"
فتحت الفنانة منة فضالي خزينة أسرارها، وكشفت أنها أصبحت ترفض فكرة الزواج بسبب تجارب صعبة مرت بها، كما كشفت تجربتها مع تبني طفلة وسبب رفضها تجميد البويضات.
وقالت منة فضالي في ندوة نيوز رووم، إنها مرت بتجربة صعبة مع التبني حينما تبنت طفلة وتوفيت وهو ما جعلها ترفض تكرار التجربة مرة أخرى، موضحة:"مش هتبنى تاني لأني تعبت لما الطفلة اللي تبنيتها توفيت، بسبب ظروف شغلي مكانش عندي وقت أتابعها كويس، ولما تعبت وتوفت مش عارفة التقصير من عندهم ولا ماتت طبيعي، واتضايقت جدًا لأني قعدت سنين مع البنت، روحت المستشفى وبكيت".
وأضافت منة فضالي أنها حينها فكرت في موضوع التبني لأنها تكبر في العمر، ولديها خوف من الزواج، قائلة: “ما خلفتش وبكبر في السن وعندي خوف من الجواز ومش بعرف أثق في راجل يمكن علشان مريت بتجارب وحشة، معنديش استعداد اتجوز وأخلف ولما أطلق أربي البيبي لوحدي، لأني اتربيت من غير أب، ومش عاوزة أربي ابني أو بنتي من غير أب، قلت اتبنى، بس الموضوع كان صعب.. في الآخر البنت مش بنتي ولا أنا مخلفاها، والله أعلم تطلع كويسة أو وحشة”.
منة فضالي: مش هجمد بويضاتي
وتابعت منة فضالي: “رافضة فكرة تجميد البويضات لأن الموضوع أحيانًا بيكون مؤذي صحيًا، وفي ناس ماتت بسببه”.
عندي عقدة من الرجالة
وأكدت منة فضالي أنها رفضت فكرة الزواج: “رفضت الجواز خلاص، وعندي عقدة من الرجالة، وفي رجالة مش بيقدروا الست اللي معاهم، بيكون متجوزة قمراية وبلسم ومن عيلة ويبص لواحدة شكلها غريب، مزاجك إيه في أنك تبص على مراتك، ويكون لسه مخلف ويبص لواحدة تاني، أنت بقيت أب استهدى ربي العيال”.
وكشفت منة فضالي أنها كانت ستتزوج منتج ليس بهدف أن يدعهما ولكنها كانت تحبه ولكنها خيرها بينه وبين عملها في الفن فرفضت، موضحة: “كنت هتجوز منتج، ومدعمنيش ولا عمللي حاجة هي حظوظ، ومفيش في حياتي تارجت إني ارتطت بواحد علشان يعملي حاجة، أنا ارتبطت به علشان كنت بحبه بجد، ولما انفصلت كنت لسه بحبه، قال لي يا أنا يا الشغل، مش عاوزك تكملي وتشطبي نفسك من النقابة، اعترضت لأني تعبت في شغلي وتعبت على ما بقيت نقابية، مشوار طويل مشيته أنا ووالدتي لوحدنا، فمينفعش بعد العمر ده تقولي سيبي الشغل.. دي قمة الأنانية”.
