سيدة تستغيث بسبب ضرب زوجها .. "لما يقولوا متجوز بنت أصول بتكون دي النتيجة"
تداول رواد مواقع التواصل الاجتماعي منشورًا لسيدة مصرية شاركت صورتها بعد تعرضها للعنف على يد زوجها، حيث روت من خلاله تفاصيل ما تعرّضت له، وقد أثار المنشور تفاعلًا واسعًا، إلا أن كثيرًا من المتابعين قابلوا القصة بالسخرية والتشكيك، بدلًا من التعاطف والدعم.
وقالت السيدة : " اتظلمت، واتشتمت بأوسخ الكلام، بالأب والأم، وفي الآخر بقيت أنا الغلطانة عشان صوتي عالي، عشان بستفزه محدش وقف جنبي، حتى اللي دخلوا في النص كانوا بيدخلوا عليا بالظلم، اتهجرت بالأيام والأسابيع والشهور، عشان “أتعلم” وأتربّى هو دا الجواز؟ جواز مافهوش كرامة؟!
كان بيضربني، ولما أمسك إيده وأدافع عن نفسي، يفضحني ويقول للناس دي “ضربت جوزها”!
أصل أنا شكلي هضرب حيطه مش راجل!
أسرار بيتنا كلها كانت بتطلع برا، ولما أزعل يقولوا عادي، كل الناس كده!
اتشتمت، واتلعنت من الراجل وأهله، ولما الدم سال من دماغي وقالي “انتي السبب”، برضو قلت يمكن أنا فعلاً السبب!
أعتذر ألف مرة، وأتمنى نرجع عشان ابني، وبرضو في الآخر أمشي مكسورة ومهانه.
هو يفضحني ويقول دي عايزة حب واهتمام وبوس! طيب لو مش من جوزي أطلب من مين؟
ولما أبطل أطلب وأقول “نعم وحاضر” عشان أريّحه، برضو مش عاجبه، ويرجع يضرب ويهين.
لما مراته تقول له “شيل البنطلون من على الكنبة” يقولها “ليك ربنا”،
ويعيّرها إنها مالهاش أهل ولا راجل، مع إن أبوها تعبان ومش قادر يتحرك.
وهو وأهله يقعدوا يعيروها: “انتي مالكش حد، انتي مالكش كبير!”
هو ده الراجل اللي بيتقال عليه صعيدي أصيل؟
