عملت الفيش النهارده.. مرتضى منصور يعلن ترشحه لانتخابات مجلس النواب المقبلة

تحدث المستشار مرتضى منصور، عن قراره الترشح للانتخابات البرلمانية المقبلة، مؤكدًا أن ميت غمر ليست مجرد دائرة انتخابية بالنسبة له، بل وطن يعشقه ويكن له كل الاحترام.

قال المستشار السابق مرتضى منصور: "الحمد لله الذي منّ عليّ بنعمة الشفاء، فعلاً الصحة تاج على رؤوس كل الناس، ويا رب ما تمر محنة المرض لا لعدو ولا حبيب، ويمكن دي المحنة هي والموت اللي مفيهمش شماتة لأن دي حاجة بتبقى مكتوبة عند ربنا، وأحيانًا بلاقي البعض يشمت في المريض".

وتوجه بالشكر لزوجته وأولاده وأحفاده، قائلاً: "بشكر طبعا زوجتي وأحمد وأمير وأميرة وأحفادي، الحمد لله، بشكر طبعا دكتور طبيب يوسف والدكتور ماهر الجابري والدكتور وليد علي ما سابونيش لحظة، الحمد لله".

وأكد أنه تعرض لمحنة صحية شديدة بسبب ارتفاع سكر الدم إلى 600، قائلاً: "فلقوا السكر يوصل 600، فأعملوني تحليل، الحمد لله مفيش حاجة ملقوهاش، وبدأنا بنقرس، المهم الحمد لله، شفانا الله، والحمد لله مصر كلها سألت عني وده بيعكس حب الناس لي، وبصراحة دي محبة أنا عمري ما شفتها".

وعن الانتحابات البرلمانية السابقة، قال منصور: “انتخابات الدورة اللي فاتت كانت مسخرة، أحمد تم إسقاطه وأنا تم إسقاطي في ميت عقبة، وبالعقل كده احنا مكتبنا في الدقي وبيتنا في العجوزة فعيب اللي حصل الدورة اللي فاتت، أما أنا بقى في ميت عقبة فكانت أضحوكة، أنا طالع الأول على الجمهورية الانتخابات اللي قبلها على جميع الدوائر يبقى معقول الانتخابات اللي بعدها يحصل كده”.

وأضاف: “أنا فوجئت بمرشحين من ميت غمر جايين عندي وبيقولولي مش هننزل غير لما أنت تنزل، أنا بوجه ليهم كل الاحترام والشكر، لو احنا عايزين جمهورية جديدة سيبوا الناس تنتخب اللي هي عايزاه. عايزين مرتضى ينتخبوا مرتضى .. مش عاريوين مرتضى ينتخبوا أي حد هما عايزينه”

وتابع: ميت غمر دي عشق، مش دايرة، ميت غمر دي وطني أنا، الوطن بيبدأ ببشلوش قريتي، ولما يكبر بيبقى ميت غمر، وبعدها المنصورة، وهي مصر كلها، ميت غمر دوول أهلي، وأنا هنزل عشان أقدم خدمة لأهلي، مش عشان أحد ينجح بالبرشوت".

وأكمل: “ لازم نسيب الناس تنتخب براحتها وبلاش نحرج النظام.. أنا النهارده عملت الفيش وتحاليل المخدرات والخمور وخلصت كل الإجراءات، وإن شاء الله يوم الأربعاء الساعة 11 هكون في مدينة المنصورة عاصمة العالم وهقدم وهلتقي بأهل ديرتي”.