مسلم يرد على قرار إيقافه من نقابة الموسيقيين: هرفع قضية عليهم ومش هسيب حقي |فيديو

في أول رد منه، خرج مطرب المهرجانات مسلم عن صمته بعد قرار نقابة المهن الموسيقية بمنعه من الغناء، حيث أكد أنه فوجئ بقرار وقفه دون التحقيق معه أو إخباره بذلك ودون وجه حق.

وقال مسلم في فيديو على حسابه بموقع فيس بوك: اتفاجأت بقرار النقابة وهو مش موضوع سهل ولا عادي، صحيت الصبح لقيت قرار إيقاف من النقابة بدون ما يعملوا معايا تحقيق وبدون أي وجه حق، وأنا في حالي.. متعرفش هل ده عند ولا عاوزين يعرقلوني، وشايفين إنك الوحيد اللي شغال لكن مش بإيدي إني ناجح.

مسلم يرد على الشكاوى المقدمة ضده

ورد مسلم على الشكاوى المقدمة ضده موضحًا: قالوا أتوقف لأن عليه شكاوى كتير، أنا اعتذرت عن حفل في الإسكندرية لأني تعبت وكنت في المستشفى عندي مكروب في الدم، المفروض كرات الدم تكون 6، أنا الكرات عندي تخطيت الـ 96، وبعت ده ومحدش اهتم بالموضوع.

محدش بيرد علي من النقابة وهرفع قضية ضد النقابة

وأضاف مطرب المهرجانات مسلم: باتصل بالنقابة محدش بيرد عليا ولا عاوزين يحلوا مشكلتي، والإقرار بوقفي مش عليه إمضاء سيادة النقيب مصطفى كامل، مش هقول غير حسبي الله ومش هسيب حقي وهطلع على النائب العام وهرفع قضية ضد النقابة لأنها ظلمتني.

وتابع مسلم: داخل عليا عيد واتظلمت في لقمة عيشي وربنا مش بيرضى بالظلم، والوسط كله شغال وأنا في البيت وأنا شقيت علشان أوصل، مش كفاية الظلم إني كل ما أنزل أغنية تتوقف ومن وقت ما جيت الدنيا وأنا في ظلمات.

وأكمل مسلم: عمري ما ظلمت حد وفي ناس في رقبتي وبصرف عليهم ومراعي دنيتي، ومتأكد أن ربنا مش هيظلمني لأن ربنا ساعات بيحط البني آدم في اختبار علشان يفوقه ويعرفه حقيقة الناس، وأنا طلعت أحكي مش علشان استعطف الناس، ولكن عاوز أعرف الناس اللي ظالمني إني مش هسيب حقي، وهما عاوزيني أقعد في البيت ويدمروا مستقبلي، مش هقول غير إننا في دولة قانون ومش هسيب بلدي وأسافر بره.