زي ما جسمنا بيحتاج ديتوكس كل فترة عشان يتخلص من السموم اللي تعبته قلبنا كمان بيحتاج ديتوكس عاطفي ينضفه من المشاعر القديمة من الحنين اللي وجعنا ومن الناس اللي سابوا أثر ولسه سايبين ريحتهم جوانا.
بس الفرق إن ديتوكس الجسم ممكن تعمله بيومين عصير أخضر ومياه دافية.
إنما ديتوكس القلب بياخد وقت دموع ومواجهة مع نفسك.
بس النتيجة في الآخر واحدة "راحه "بعد تعب ونفس جديد بعد اختناق.
إحنا بنحتاج نعمل ديتوكس عاطفي لما نحس إننا بقينا مش شبه نفسنا لما نضحك بس من غير طعم ونتكلم بس وإحنا مطفيين .
ساعتها بنفهم إننا مش زعلانين من حد بعينه إحنا بس تعبنا من التراكمات.
من كلام ما اتقالش ومن مشاعر ما خدتش مكانها الصح،
ومن وجع سايب أثر فينا كل يوم بيزيد.
الديتوكس العاطفي مهم…
لأنه الطريقة الوحيدة اللي نرجع بيها نفسنا بعد ما ضاعت وسط العلاقات والتعلق والخذلان.
هو مرحلة “تنضيف حقيقي” مش بس من الناس لكن من الأثر اللي سابوه جواك.
بتعمليه إمتى؟
لما تلاقي نفسك بتفكري في نفس الشخص كل يوم رغم إن مافيش حاجة جديدة.
لما تفضلي تحاولي ترجعي حاجة خلصت لما تحسي إنك بتتأذي من العلاقة أكتر ما بتتقدمي .
لما تحسي إنك بقيتي تعيشي على الذاكرة مش على الواقع.
ساعتها لازم توقفي…
مش علشان تقسي على نفسك لكن علشان تحميها.
الديتوكس العاطفي هو نقطه فاصله اللي بتقول فيها لنفسك: كفاية وجع.
اعمليه لما تحسي إنك فقدت طاقتك اعمليه لما تحسي إنك بتبرري طول الوقت اعمليه لما قلبك يبطل يفرح أو لما كل حاجة حواليك تفكرك بنفس الشخص.
اعرفي إن اللحظة دي هي العلامة اللي بتقولك إن وقت التنضيف جه.
الديتوكس العاطفي مش بيحصل بيوم وليلة.
هو مش قرار ده رحلة صغيرة ما بين الوجع والراحة.
فيها دموع وفيها مقاومة بس كل يوم هيقل الحمل هتعرفي وقتها إنك ماشيه صح.
مع الوقت هتكتشفي إنك بتتكلمي من غير ما بتتهزي وإن الذكريات بقت خفيفة وإنك مش ناسية لكن خلاص بطلتي تتأذي.
اهنيه الديتوكس؟؟
إنه بيخليكي ترجعي لنفسك ترجعي تحبيها وتحسي إنك مش ناقصة حاجة.
بيخليكي تتنفسي براحتك وتختاري الناس اللي تستحق وجودك من غير خوف ولا تردد.
نصيحتي؟
ما تستنيش توصلي لآخر وجعك علشان تبدأي التنضيف.
ابدئي أول ما تحسي إنك مش مرتاحة وأول ما قلبك يهمسلك إن الحاجة دي بقت تقيلة عليك.
اسمعي الإشارة دي لأنها دايمًا صادقة.
خدي وقتك واعملي ديتوكسك على مهلك ابعدي واكتبي واسكتي شوية وارجعي بس بعد ما ترتاحي.
مش عيب إنك تتعبي العيب إنك تكملي وانتي موجوعة.
وفي الآخر…
اللي بينضف قلبه ما بيخسرش هو بيكسب نفسه من جديد وقلبه يدق تاني بس وهو مطمن .
