إيمان السيد ترد على انتقادات دورها في وتقابل حبيب: أتقبل النقد لكن دون تجريح
بعد موجة الانتقادات التي واجهتها الفنانة إيمان السيد حول دورها في مسلسل وتقابل حبيب، اضطرت إيمان للرد على تلك الانتقادات اللاذعة عبر صفحتها الشخصية بموقع التواصل الإجتماعي إنستجرام.
وكتبت إيمان السيد: “أنا فاهمة ومدركة جدا ان دوري في العمل نفسه مش عاجبك كمشاهد ودا حقك جدا، وانا شخصيا ببقى عارفة و مدركة لما بعمل دور مش حساه وببقى متفهمة طالما انك تبدي رأيك بموضوعية واحترام، وعارفة كويس إن ممكن أي حاجة كويسة عملتها قبل كدا تتنسي في ثانية في وسط هجوم بسبب دور لم ينل استحسانك (ودي حاجة تعلمتها مع الوقت إني أتوقع أي شيئ)”.
وتابعت: “وأنا شخصيا اتعلمت في حياتي ألا ألقي بأخطائي على شماعة الغير، لاني لو عملت كدا مش هاتقدم خطوة في حياتي، وانا كبيرة كفاية إني أتحمل دايمًا نتيجة اختياراتي، وأكيد بتضايق شوية لاني طول عمري باحفر في الصخر علشان اتقدم خطوة أو على الأقل أثبت مكاني، ولكن مع الخبرة في الحياة وفي شغلي اتعلمت أتجاوز المواقف وأفكر في اللي جاي ومتفائلة ودايمًا ظني خير في ربنا سبحانه وتعالى.”.
وأضافت إيمان السيد: “وكنت دايما لما حد يعرض عليا دور صغير بقول أنا ممكن أعمل دا مع ياسمين فقط، لأن الناس عارفة رصيدنا مع بعض، وعمري ما قرأت قبل كدا تعليق بيقول ان حد بيفرضني على العمل غير المرة دي، ولا قرأت كلام مؤذي زي المرة دي، لدرجة ان زميلة ليا في العمل كلما أبدت رأيها في شيئ على السوشيال ميديا ألاقي نفسي بتهاجم في الكومنتات حتى لو كان البوست بتاعها ليس له علاقة بالعمل نفسه”.
واختتمت إيمان السيد: “ وأنا قبل ما أبتدي نصوير كلمت أستاذ عمرو مؤلف العمل واللي بحترمه جدا وكنت بعتذر عن الدور، وبعترف اني عملت دا في توقيت سيئ وماكانش ينفع، وهو شخصيا قالي مش هينفع تعملي كدا مع ياسمين وقولت له أنا ممكن أجيلها مشهد واحد في مسلسل بس أكون حاسة المشهد وفي النهاية اشتغلت لان توقيتي زي ماقلت كان غلط، وأنا سعيدة بنجاح العمل ومبسوطة بياسمين وفرحانة علشانها لأنها تستاهل..i got my lesson”.
