صابرين جابر تعلق لنيوز رووم عن التعلق: حضوره غياب… وغيابه وجع

قالت صابرين جابر خبيرة العلاقات الأسرية في تصريحات خاصة لـ نيوز رووم: في فيديو انتشر مؤخراً بنت واقفة على المسرح وسط ضوء قوي بس الموقف كله كان صامت.
ماسكة جاكيت وقبعة فاضية كأنها بتحاور شخص مش موجود.
تتحرك حواليه بخفة تضحك تلمسه بحنية وتبص في الفراغ كأنها شايفة اللي محدش شايفه.

الناس شافت عرض فني مؤثر لكن اللي عاش وجع التعلق  فهم الرسالة من غير ترجمة.
البنت كانت بتمثل قصة كل حد لسه بيحاور غياب.
كل واحد بيكلم في خياله شخص مشي وبيحاول يكمل حوار اتقطع فجأة من غير “نهاية”.

زي أغنية “سبت فراغ كبير” اللي اتحولت من لحن إلى مساحة مفتوحة لكل اللي قلبه موجوع.

الأغنية مش بس عن الفقد…
هي عن “اللي فاضل بعد الفقد”.
عن المسافة بين إنك تشتاق وإنك تعرف إن الرجوع خلاص مش وارد.

وأكدت: التعلق بيبدأ بلحظة حلوه 
بس بينتهي بسكون موجع.
زي مسرح فاضي بعد تصفيق طويل والنور اللي كان مالي المكان بقى نقطة صغيرة في آخر المشهد.

حضوره كان غياب وغيابه وجع.
بس بعد كل ده لازم نفهم حاجة…
إن اللي بيمشي ما بياخدش النور كله بيسيب دايمًا أثر بسيط جوا القلب 
 أثر بنفتكره  وبيوجع بس كمان بنتعلم منه.

الوجع ما بيروحش فجأة هو بس بيهدى مع الوقت.
لحد ما يبقى ذكرى خفيفة تعدي جوا القلب بهدوء زي نفس عميق بعد بكا طويل.

في النهايه.
ماتخليش غياب حد يوقف حياتك اللي  ساب فراغه كان فصل مش القصة كلها.
إدي نفسك فرصة تبدأ من جديد 
مش علشانه لكن علشانك.
لأن اللي عرف يسيب لازم أنت كمان تعرف تكمل من غيره .