ياسمين عز للزوجات : "البسي روب بريش لجوزك.. وابنك في الآخر واحدة تانية هتاخده"

وجهت الإعلامية ياسمين عز خلال برنامجها كلام الناس المذاع على شاشة MBC مصر مجموعة جديدة من النصائح للزوجات، ركزت فيها على ضرورة أن يحظى الزوج باهتمام خاص داخل البيت، مؤكدة أن كثيرًا من النساء يضعن كل طاقتهم في رعاية الأبناء وينسين أزواجهن.

وقالت عز: "أنا عمري ما شوفت واحدة بتجهز سفرة متكاملة لجوزها، لكن بشوف ده مع العيال عاملي جوزك أحسن من ابنك، لأن ابنك في النهاية هيكبر وهيكون له حياته الخاصة، لكن جوزك لو ما لاقاش الاهتمام ممكن واحدة تانية تاخده منك".

الإسدال لا يكفي

وانتقدت الإعلامية ظهور بعض الزوجات أمام أزواجهن بملابس الصلاة أو الإسدال معظم الوقت، موضحة أن ذلك لا يليق بدور الزوجة كرفيقة حياة: "هو إيه لازمتك كزوجة لو طول الوقت قاعداله بالإسدال؟ قومي البسي روب بريش، سرحي شعرك، ارشي برفان، واقعدي جنبه هو أولى إنك تكوني متألقة معاه، مش بس بره البيت".

يوم الجمعة للزوج فقط

ولفتت عز النظر إلى أن يوم الجمعة ينبغي أن يكون مخصصًا للزوج بشكل استثنائي، قائلة: "الجمعة ده يومه هو، خليه يحس إنه مميز عندك. اعملي له أكلة بيحبها، اقعدي معاه بجو مختلف، وخلي اليوم ده معمول مخصوص عشانه".

تفاعل واسع على السوشيال ميديا

أثارت تصريحات ياسمين عز جدلاً كبيرًا على مواقع التواصل الاجتماعي. فبينما أيدها البعض معتبرين أنها تدافع عن حقوق الرجل وتعيد التوازن داخل العلاقة الزوجية، انتقدها آخرون بشدة ورأوا أن كلامها يقلل من مكانة المرأة ويضعها في صورة الخادمة داخل البيت.

وفي نفس السياق ،قالت عز في حديثها: "النهارده إجازة وولادك مرحوش المدرسة، وجوزك كمان إجازة.. قومي اعملي له تراميسو، طلعي النسكافيه وصوابع الست، واعملي الحلو لجوزك زي ما بتعملي لولادك."

وأضافت ياسمين عز: "جوزك نزل يصلي الصبح، جلبيته متكوتش.. عيب! هو مش متجوز؟ قومي شوفي طلباته، اهتمي بيه زي ما بتهتمي بولادك. إنتي بتقومي من الفجر عشان تحضري لانش بوكس قد الحلة لولادك، وجوزك يا عيني مخدش حتى لقمة."

هاجمت  ياسمين عز، فكرة إهمال الزوج، مشيرة إلى أن بعض الزوجات يفرطن في الاهتمام بأبنائهن على حساب أزواجهن، قائلة: "بتحطي لابنك نص فرخة كاملة، وجوزك الغلبان عمرك ما عملتِ له حتى سندوتش جبنة بخيار. بتحطي للسلحف الصغير نص فرخة وتسيبي الراجل من غير ولا لقمة. هل ابنك ده صنايعي في ورشة عشان ياخد كل الأكل، وجوزك اللي شايل البيت ملوش نصيب؟"