العلاقات بين الراجل والست شبه البرفيوم بالظبط في الأول تبقى كلها بهجة وجمال وريحة حلوة بتسحرك.
لكن لما حد في العلاقة يقرر يكسر التاني بيحصل زي ما بيحصل للبرفيوم لما الإزازة تتكسر بتشم ريحة قوية فعلًا بس للمرة الأخيرة.
الكسر مش رجولة ولا قوة ممكن كلمة جارحة في لحظة غضب أو إهمال متعمد أو تصرف محسوب يوجع اللي بيعمل كده بيفتكر إنه بيثبت نفسه لكن الحقيقة إنه بيكسر اللي قدامه وبيخسر.
الجرح ساعات بيدي إحساس بالنصر بس بعدها بتحس بالفراغ .
زي بالظبط ما تفتح برفيوم غالي وتسيبه يضيع ريحة قوية للحظات وبعدها الإزازة فاضية ومفيش حاجة بترجع تاني زي ماكانت ولا الريحه موجوده ولا الحب والسعاده اللي كنت حاسس بيها هيبقوا موجودين بتحس بفراغ الحب الحقيقي محتاج رعاية مش كسر .
الراجل محتاج يحس إن الست شايفة قيمته والست محتاجة تحس إن الراجل مهتمه بيها حتى في أسوأ حالاتها.
أي تصرف يهز الثقة دي بيشيل أجمل مابينهم
اللي بيحب بجد ما يستسهلش يجرح.
يعرف يكتم غضبه يختار كلامه ويمد إيده للتصالح قبل ما يمدها للكسر .
الحب مش محتاج كسر ولا عناد.
الحب محتاج صبر واحتواء ووعي.
وكل مرة تجرح أو تهمل بتخسر ريحة من البرفيوم اللي كان مالي حياتك.
وفي يوم هتلاقي نفسك فضيت الإزازة بإيدك وساعتها هتشم آخر ريحة من البرفيوم… وأصعب لحظة ندم.
