منى عبد الغني: «اتقدم خطوة» يفضح تضحيات الأهل.. و«عزالدين»: جيل حرم نفسه
ألقت الإعلامية منى عبد الغني الضوء على تريند جديد عبر مواقع التواصل الاجتماعي يحمل اسم «اتقدم خطوة»، معتبرة أنه من أجمل الظواهر الإيجابية على السوشيال ميديا خلال الفترة الأخيرة، لما يحمله من رسائل إنسانية تكشف حجم تضحيات الأهل من أجل أبنائهم.
وقالت منى عبد الغني، خلال برنامج «الستات مايعرفوش يكدبوا» المذاع على شاشة قناة الـ سي بي سي: «السوشيال ميديا فيها حاجات كويسة، ومنها تريند عاجبني جدًا اسمه اتقدم خطوة، الترند ده بيظهر قد إيه الأهل ضحّوا عشان ولادهم يكونوا في مكان أفضل، كل إجابة صح بيجاوبها الأب أو الابن بيتقدم فيها خطوة لقدام».
التريند يختصر الفجوة بين الأجيال
وأوضحت عبد الغني، أن هذا التريند يختصر الفجوة بين الأجيال، مضيفة: «الأب دايمًا واقف مكانه.. طفولته كانت فيها مسؤوليات كتير وماكانش عنده رفاهية زي اللي عند أولاده دلوقتي، الجيل الجديد متقدّم خطوات عن أهله، بس مين السبب؟ الأهل اللي تعبوا وضحوا».
من جانبها، علّقت الإعلامية إيمان عز الدين على البُعد الإنساني للفكرة، مستعيدة موقفًا جمعها بوالدها الراحل: «الترند ده فكرني بحوار قديم بيني وبين والدي الله يرحمه، لما زعلت منه مرة وقال لي: أنا تربيتي غير تربيتك، والبيت اللي أنا جاي منه غير البيت اللي إنتِ اتربيتِ فيه، لما بقيت أم، فهمت كلامه».
الأجيال اللي قبلنا كانت بتحرم نفسها عشان تدينا
وأضافت عز الدين: «فعلاً، الأجيال اللي قبلنا كانت بتحرم نفسها عشان تدينا، دلوقتي احنا بنشوف أطفال عندهم غرف خاصة وألعاب وسفر ومطاعم، وإحنا كنا بنركب مواصلات ونتعب، لازم الأولاد يقدّروا ده».
فيما أكدت منى عبد الغني أهمية الاعتراف بجميل الأهل مهما كانت قسوة أسلوبهم في التربية أحيانًا، قائلة: «أوعى تنسى المعروف اللي عمله فيك أبوك وأمك، هم كانوا بيتأخروا عشان يكونوا في ضهرك، ده الاستثمار الحقيقي، بيشيلوا من بوقهم ويدّوك، وبيحوشوا عشان تطلع مصيف زي قرايبك».
فيما روت عز الدين قصة مؤثرة عن طالبة طب قدّمت الشكر لوالدها النجار الذي تكفّل بمصاريف تعليمها: «الأب ده شال من نفسه عشان يديها، وده أعظم تقدير ممكن يتقال له».
