بالدموع.. نورا الجزار صاحبة واقعة التحرش: "أنا عايزة حقي"
شهدت إحدى حلقات برنامج "الستات" المذاع عبر قناة النهار مداخلة هاتفية مؤثرة من الفتاة "نورا الجزار"، صاحبة واقعة التحرش الأخيرة، حيث روت تفاصيل ما تعرضت له وهي تبكي وتؤكد أنها لن تتنازل عن حقها.
بداية الواقعة
قالت نورا: "أنا لسه قلقانة شوية، والموضوع مش سهل يمر عليه كام يوم كدا. اللي حصل إن المكان اللي اتعرضت فيه للتحرش كان بعيد، ولما صرخت وقلت (حرامي) الناس مسكوه، لكن أول ما قولتلهم إنه متحرش قالولي (إزاي ما قولتيش من الأول؟)".
وأضافت أنها فوجئت ببعض الأشخاص يحاولون تهدئة الموقف: "كل واحد فيهم إداله قلم كدا عشان يلموا الحوار، وبدأوا يقولولي معلش ده دماغه تعبانة، متبلغيش عنه، أو عشان مامته تعبانة، أو حتى قالولي اضربيه بنفسك. لكن أنا أصلاً مكنتش عايزة حد يضربه، أنا عايزة حقي بالقانون مش بالإيد".
موقف الناس من المتحرش
أوضحت نورا أن رد فعل الموجودين في البداية صدمها: "لما قولت إنه متحرش، الناس سابوه، لكن لما قلت حرامي مسكوه ،أنا كنت لوحدي في الشارع وهو شخص عمري ما شوفته في حياتي. الناس في الأول خلوني أحس إني غلطانة، لدرجة إني مكنتش عارفة أنام من التفكير"، مؤكدة أن المجتمع أحيانًا يحمل الضحية الذنب بدلاً من الوقوف بجانبها.
تدخل الشرطة والنيابة
وأشارت إلى أنها تواصلت فورًا مع النجدة: "طلبت النجدة وهما جم وخدوه في البوكس، وروحت على القسم، واتعمل محضر رسمي. بعدها المحضر راح للنيابة يوم الخميس"، مؤكدة أن الإجراءات القانونية مستمرة.
كما كشفت عن موقف صادم واجهته مع المحامي: "المحامي في النيابة قالي ممكن تكوني فهمتي غلط، لكن أنا انفجرت فيه وقلتله: (ده مسك جسمي!)، وساعتها سكت"، موضحة أنها مصممة على استكمال الإجراءات حتى النهاية.
دعم السوشيال ميديا
وأكدت نورا أنها استمدت قوتها من دعم الناس لها عبر منصات التواصل الاجتماعي: "الناس على السوشيال ميديا وشجعوني جدًا، وخلوني أحس إني مش لوحدي ، وأنا مبسوطة إن النيابة وقفت معايا وبدأت تاخد خطوات جادة"، مشيرة إلى أن هذا الدعم ساعدها على مواجهة محاولات التقليل من الواقعة أو تبريرها.
رسالة نورا الأخيرة
اختتمت نورا حديثها والدموع في صوتها قائلة: "أنا عايزة حقي، ومش هتنازل اللي حصل معايا ممكن يحصل لأي بنت، ولازم نواجه الظاهرة دي وما نخافش. حقي مش بس حقي أنا، ده حق كل بنت في الشارع".
