صابرين جابر لـ نيوز رووم: حين تتغير القلوب وتبقى الذكرى
مما لا شك فيه أن العلاقات دوما متغيرة وتتطور كثيراً، ولذلك فإن التعامل مع التغيير يتطلب تفهم الطرف الآخر وإيجاد طرق من أجل ادارة الاختلافات، وفي هذا السياق كشفت خبيرة العلاقات الأسرية صابرين جابر لـ “نيوز رووم”، التغير في العلاقات.
قائلة: لأن هذه الاختلافات والتغيرات تجعل هناك ظروف ضاغطة داخل الأسرة ومليئة بالصراعات والصعوبات.
الغريب في القلب مش إنه يحب.. الغريب إنه يعرف ينسى.
وتابعت: إزاي حاجة كنا بنعيش بيها وبنحارب عشانها فجأه تبقى ولا كأنها حصلت! إزاي صوت كنا بنستناه وننام على نغمته يبقى مجرد رنة عادية لا بتوجع ولا بتفرح إزاي ضحكة كانت بالنسبة لنا حياه تبقى ذكرى باهتة ملهاش طعم.
القلوب بتتغير بجد ومش بس بتتغير دي بتعرف تقسى تبرد وتاخد خطوة لورا كأنها بتقول: “اللعبه خلصت وانتهت.”
وإنت اللي كنت فاكر نفسك مش هتقدر تعيش من غيرهم بتصحى في يوم تلاقي نفسك عايش عادي وبتضحك عادي ويمكن مبسوط أكتر كمان.
اللي بيحصل ده مش ضعف ولا جحود بالعكس ده رحمة، رحمة من ربنا إن القلب مش بيفضل متعلق بنفس الوجع ولا بنفس الأشخاص رحمة إن الأيام بتاخد مننا اللي كان تقيل علينا ونفتكر إننا مش هنقوم بعده ونلاقي نفسنا قمنا ووقفنا ومكملين.
سبحان مقلب القلوب بين يوم وليلة ممكن قلبك يبرد من أكتر حد كنت شايفه حياتك. وممكن اللي كنت بتحارب عشانه تبصله بعد سنين تستغرب إزاي كنت شايفه كل ده.
وعلشان كده ما تديش وعد إنك “على طول” لحد وما تصدقش قوي اللي يقولك من غيرك ما اقدرش أعيش القلوب ساعات القلب بيغدر حتى بصاحبها وتغير أولوياتك كأنك بتلبس وش جديد.
وأكدت: لكن اللي يثبت في قلبك رغم كل ده. هو اللي يستاهل مكانه بجد.
لإنه مش بس عدي من فوق الأيام والظروف ده كمان نجح إنه بكون في وجدانك مهما الدنيا لفت مكانه محفوظ جواك وجوه قلبك.
