مش هحب تاني وكنت رافضة رأفت الهجان .. أبرز تصريحات سماح أنور في أسرار النجوم
كشفت الفنانة سماح أنور، عن رفضها دخولها في علاقة حب جديدة وآرائها حول الرجال، كما تطرقت إلى كواليس عدد من أعمالها الفنية، وذلك ضمن حوارها مع الإعلامية إنجي علي، في برنامج أسرار النجوم، الذي يُذاع عبر نجوم إف إم.
إمرأة واحدة لا تكفي الرجل
وقالت سماح : “إمرأة واحدة لا تكفي بالنسبة لمعظم الرجال، لأن الإنسان بطبعه يمل، والراجل ملول جسديا، وعلى المستوى الشخصي والنفسي مش عايز كلام كتير، ولكن الست بتحب تتكلم عشان تعبر عن مشاعرها”.
وأضافت : “الراجل لما بيمل جسديا، بيروح لواحدة تانية خالص عشان يهرب من الكلام، الست اللي في إيدها الراجل، ربنا عاملها هي اللي بتعرف في العواطف والاستقرار، لأن عندها القدرة على الاحتواء”.
رفض سماح أنور دخول علاقة عاطفية جديدة
أما عن رفضها الدخول في علاقة عاطفية جديدة، قالت سماح أنور : “مش هحب تاني، وقررت عدم الدخول في أي علاقة عاطفية جديدة، ومش مؤمنة بفكرة أن لكل سن حلاوته، والسن مش شئ مهم، لكن المجتمع أصبح يستغله كوسيلة ضغط على الستات علشان يعملوا بوتوكس وفيلر".
كواليس شخصية أم هاشم
وكشفت سماح كواليس تقديمها شخصية أم هاشم في مسلسل كتالوج مع محمد فراج، قائلة : "كل حاجة في أم هاشم فيا، لكن أنا مش مع وجود مربية في البيت علشان ولادي، أنا مع فكرة الأم هي المربية الوحيدة أو الجدة، لو حد غريب لازم يبقى أم هاشم، أمينة للدرجة دي وبتحبهم يمكن أكتر من أهاليهم، لكن ده نادر جدا".
مشاركة سماح أنور في ذئاب الجبل
وعن مشاركتها في مسلسل ذئاب الجبل، واصلت : “المسلسل كان غريب، بدأته مع الفنان صلاح قابيل وتوفي وكان متبقياً له في الدور 3 مشاهد، وبعدها عمل الدور عبدالله الغيث وتوفى قبل آخر 3 مشاهد برضو، وده كان شئ صعب جدًا”.
رفضت دوري في مسلسل رأفت الهجان
وتحدثت سماح أنور عن مشاركتها في مسلسل رأفت الهجان، مشيرة إلى رفضها تقديم الدور في البداية، قائلة : “المخرج يحيى العلمي هو اللي رشحني للدور، ووقتها كنت نجمة سينما، ولقيت الدور صغير فرفضته في الأول”.
واختتمت : “بعدها كلمني الراحب محمود عبد العزيز، وقالي أنه وقف جنبي في أعمالي، وده عمل قومي وملحمة هتعيش كتير، وتعالي قدمي الدور واسمعي كلامي، وفعلًا عملت الدور، وكل اللي شارك في المسلسل مشاهده الناس فكراها كويس”.
