ياسمين رحمي عن والدتها عفاف مصطفى: "قايمة بدور البطولة في حياتي" |خاص
انتهت الفنانة ياسمين رحمي مؤخرًا من عرض حلقات حكاية هند ضمن حكايات مسلسل ما تراه ليس كما يبدو، وكانت الفنانة عفاف مصطفى والدة الفنانة ياسمين رحمي حريصة على دعمها طوال فترة عرض الحكاية، ولذلك تواصل موقع نيوز رووم مع الفنانة ياسمين رحمي لمعرفة ما دور والدتها عفاف مصطفى في دخولها المجال الفني.
“ماما قايمة بدور البطولة في حياتي”
وقالت ياسمين رحمي في تصريحاتها: “ماما تقوم بـ دور البطولة في حياتي .. ماما بتهتم بشغلي أكتر ما بتهتم بشغلها هي نفسها .. ودي طبيعة الأمهات .. كانت بتدعمني بشكل كبير جدًا في المسلسل .. حتى في بداية تصوير حكاية هند كانت تقرأ معايا المشاهد وتساعدني في الأداء .. هي اللي وجهتني بشكل كبير أوي .. لما بدأت الحكاية تتذاع كانت متحمسة جدًا وتقعد تشوفها معايا .. وكانت تقولي نصايح وحاجات أخد بالي منها بعد كده .. وكل ما تشوف ردود أفعال كانت تنشرها على صفحتها وتقولي بصي الناس بتقول ايه .. هي أكتر حد كان مبسوط بالنجاح .. علاقتنا قريبة جدًا لأننا في وسط واحد .. ودي حاجة مريحة جدًا أحنا فاهمين بعض وعارفين نستشير بعض”.
ذكريات ياسمين رحمي مع بداية دخولها المجال
واسترجعت الفنانة ياسمين رحمي ذكرياتها مع بداية دخولها المجال: “دخولي الوسط كان من بدري أوي .. لأاني كنت بروح مع ماما لوكيشن التصوير لأنها كانت بتشتغل في المجال .. كنت لسه طفلة وقت مثلا فيلم حريم كريم .. وكنت بقعد اتفرج .. فأنا موجودة في اللوكيشن من بدري .. وكنت بقولها ماما قولي للمخرج أعمل دور أي طفلة معاه .. فكانت في الأول واخدها على أنها لعبة .. وكنت بمثل أدوار صغيرة .. لحد ما جيت أدخل الجامعة قولتلها ماما أنا هاخد التمثيل كرير .. قالتلي يا بنتي أنا بشفق عليكي المجال صعب وفي إحباطات كتير .. قولتلها أنا كل ده عارفاه وهاخد التحدي ومش مستعجلة على النجاح والشهرة خالص .. وصلت وصلت موصلتش هفضل مستمتعة بحياتي وهكون أسرة وهخلف عادي جدًا .. ومن وقتها وهي بتقولي أنا في ضهرك في استشارات أو مساعدات”.
تعليق ياسمين رحمي على مصطلح أبناء العاملين
وعن مصطلح أبناء العاملين، قالت ياسمين رحمي في تصريحاتها: "أنا مش شايفة نفسي من أبناء العاملين .. لأن ماما مش فنانة كبيرة .. هي محتاجة فرص زي ما أنا محتاجة فرص .. فأحنا بنشجع بعض وبنسند بعض .. وممكن ترشحني في بعض الأعمال أو تقول للمخرج عليا وأنا بعمل كده معاها لو اشتغلت مع مخرج هي متعرفهوش بعرفها عليه وبتعرض عليه شغلها".
