فيه حاجة الناس كتير ما بتاخدش بالها منها إن الحب الحقيقي مش بيتقاس بكتر الكلام الحلو ولا بعدد الوعود اللي بنرميها لبعض.
الحب الحقيقي ساعات بيبان في أبسط وأصعب حاجة: الامتناع.
الامتناع عن كلمة نعرف إنها هتوجع عن تصرف إحنا متأكدين إنه هيكسر عن موقف هيبني جوا قلب اللي قدامنا جرح مش هينسى.
يمكن تقول إن الكلمة الصغيرة دي مش هتعمل حاجه يمكن تتخيل إن الفعل بسيط ومش فارق بس الحقيقة إن اللي قدامك قلبه بيتأثر أضعاف.
ممكن كلمة تهدم اللي اتبنى في سنين وممكن لحظة غضب تمسح كل الأمان اللي كان بيتخزن في الروح.
الامتناع مش ضعف ولا خوف الامتناع وعي الوعي إنك شايف قد إيه اللي قدامك حساس وإنك مدرك إنك بتمتلك زرار بيحدد فرحته أو وجعه.
الامتناع هو قمة القوة إنك تسيطر على نفسك في لحظة ممكن تنفلت فيها تختار تصون بدل ما تجرح تختار تسكت بدل ما تكسر .
أوقات كتير الناس بتفتكر إنهم بيحبوا علشان بيقولوا بحبك أو بيجيبوا هدية أو بيقفوا جنبك في فرح.
بس الحقيقة؟
أرقى صور الحب بتبان في لحظة صمت لحظة قرار لما تختار ما تأذيش.
اللي بيحب بجد مش محتاج يثبت لأن الامتناع نفسه هو البرهان.
الامتناع اللي بيوصل رسالة صامتة أقوى من ألف كلمة:
أنا اخترت أحافظ على قلبك كأنه قلبي
وفي الآخر الامتناع مش مجرد فعل بسيط الامتناع هو أجمل لغة حب لغة صامتة لكنها أصدق من أي كلام.
