مي فاروق في عيد ميلادها: فخورة إني زوجة لرجل محترم وأم لأولاد تشرف
وجهت المطربة مي فاروق رسالة لجمهورها تعبر فيها عن امتنانها لحبهم ودمعهم الذي يصلها دائمًا، كما عبرت عن فخرها لما وصلت إليه في مشوارها الفني وكأم وزوجة، وذلك بمناسبة عيد ميلادها الـ43.
ممتنة جدًا لله على كل نعمة
وكتبت مي فاروق في منشور عبر حسابها بموقع إنستجرام: “النهارده عيد ميلادي. ممتنه لكم جدًا لكل الحب اللي شايفاه في بوستاتكم وكلامكم وحبكم اللي دايما بيوصلني. وأما عني أنا أحب أقول لنفسي أنا فخوره جدًا بما أنا عليه الآن وممتنة جدًا لله على كل نعمه. من سنين وأنا صغيرة حلمت حلم كبير وما كنتش عارفة مكتوب لي أحققه ولا لأ فضلت وراه وبفضل ربنا قدرت أحققه وأحقق أكتر من اللي تخيلت إني أقدر عليه”.
فخورة بكوني أم حقيقية لأولاد تشرف
وأضافت مي فاروق: “فخورة بكوني أم حقيقية لأولاد تشرف واتمنى أكون دايما ضهر لهم ومشرفاهم. فخورة إني زوجة لرجل محترم مش سهل يبقى فيه زيه كتير في زمننا ده. فخورة اني قادرة أخرج من حياتي أي حد سام وربنا بيبعده عني. فخورة إني كنت ابنة بارة لأهل عظماء سابوني وهم راضيين عني. ممتنة لله جدا على كرمه وعوضه ليا دايما الجميل في كل حاجة”.
وتابعت مي فاروق: “شكرا لله على كل ما أنا عليه الآن واتمنى أكون دايما للأحسن. شكرا لكل اللي قابلوني وحبوني من قلوبهم. أنتم كنز حقيقي. شكرًا أمي وأبويا على رضاكم عني. كنت أتمنى وجودكم للأبد عشان تفرحوا بيا بس دايما دعواتكم محاوطاني. شكرًا أخويا ومراته وولاده. شكرا ولادي وجوزي وعيلتي الحلوة المحترمة اللي في حياتي. شكرا فريق عملي اللي هم اصبحوا من أفراد عيلتي علي حبكم وصدقكم في كل حاجة. شكرا أصحابي اللي هم عيلتي على حقيقتكم وحبكم اللي بجد مش تمثيل”.
شكرا لنفسي إنها طلعت أقوى بكتير مما تخيلت
واختتمت مي فاروق رسالتها كاتبة: "شكرا من كل قلبي لجمهوري اللي حبني ودعمني واحترمني من ساعة ما ابتديت لحد يومنا هذا شكرا لكل فرد فيكم. وفي الآخر شكرا لنفسي إنها طلعت أقوى بكتير مما تخيلت. امنيتي اقدر اكمل المشوار مع ولادي لحد ما يبقوا قد الدنيا كلها واكون دايما حسنة السيرة وطيبة الأثر
بحبكم قوي قوي قوي".
