إحنا كبشر مش محتاجين معجزات عشان نرضى ولا محتاجين مجهود خارق عشان نهدى ساعات كل اللي بيخلي المشكلة الكبيرة تذوب في ثانية هو “كلمة حلوة”. كلمة بسيطة جدا زي “آسف”"ما تزعلش”، “أنا بحبك”، “أنا جنبك الحروف الصغيرة دي ممكن تبني جسر بين قلبين في عز ما كانوا بيبعدوا.
المشكلة مش دايما في اللي حصل المشكلة في اللي ما اتقالش لما تسيب اللي قدامك لدماغه يفسر ويحلل ويكبر المواضيع جوا نفسه ساعات بتتحول الحكاية من موقف بسيط لجرح عميق لأن الدماغ لما تتساب لوحدها بتخترع بتزود وبتخلي أي موقف عابر كأنه خيانة أو تجاهل أو استهتار.
الكلمة الحلوة مش رفاهية ولا زيادة دي أمان الشخص اللي قدامك لما يسمع منك “أنا مقدّرك” بيحس إنه مش لوحده. لما تقول “أنا غلطان” بتكسر كبرياء الموقف وبتطبطب على الوجع ولما تقول “أنا معاك” الدنيا كلها بتبقى أهون.
السكوت ساعات بيتاخد على إنه برود أو عدم اهتمام او حتى استهانة بالمشاعر ويمكن أنت من جواك مش قصدك كده بس اللي قدامك مش هيعرف نيتك هو مش بيسمع غير صمتك والصمت ده بيوجعه أكتر من المشكلة نفسها.
يا جماعة العلاقات مش بتنهار فجأة العلاقات بتقع كلمة ورا كلمة أو بالأصح: سكوت ورا سكوت لما المشكلة الصغيرة تتحل بكلمة في وقتها بتبقي العلاقة أقوى. لكن لما نسيب المسافات تكبر ونتعامل كإن مفيش حاجة حصلت بتتراكم الحاجات لحد ما يوصل الطرف التاني إنه يبقى مليان وجع ساكت.
الكلمة الحلوة مش ضعف بالعكس دي قوة. قوة إنك توقف دموع وتطفي نار وتلم كسر، وتزرع طمأنينة قوة إنك تختار تبقى أحن مش أعند.
وفي النهاية لا الدنيا ولا الوعود بتبني علاقة الكلمة اللي تطمن القلب هي اللي بتحافظ عليها أما الصمت ممكن يهد كل اللي اتبنى.
