صابرين جابر تحلل علاقات مسلسل "ما تراه ليس كما يبدو"
اهتمام كبير شهدته الحلقة الأولى من حكاية «هند» زمن مسلسل «ما تراه ليس كما يبدو»، إذ تمكنت الفنانة ليلى زاهر أنَّ تخطف أنظار الجميع على مواقع التواصل الاجتماعي بعد تجسيدها شخصية هند، تلك الفتاة التي تعرضت للخيانة الزوجية وطلقها زوجها «يوسف» الدور الذي يجسده الفنان حازم إيهاب دون علمها، في هذا السياق علقت خبيرة العلاقات الأسرية صابرين جابر في تصريحات خاصة لـ “نيوز رووم” حول تحليل العلاقات في المسلسل والتي تشبه الكثير من الواقع.
الحب كما يبدو… والحقيقة كما هي
في مسلسل ما تراه ليس كما يبدو كل حكاية بترمي في وشنا سؤال واحد:
هل اللي شايفينه فعلا هو اللي موجود؟ ولا في طبقات أعمق مستخبية ورا المشهد الظاهر؟
أضافت: المسلسل بيلعب على فكرة بسيطة لكنها مؤلمة: الصورة ممكن تبان هادية ومتوازنه اوحتى سعيدة… لكن الحقيقة تحتها بتكون مليانة صراعات أسرار ووجع محدش شايفه. وده بالظبط اللي بيحصل جوه علاقات كتير حوالينا.
خدي مثل بسيط: بنت قاعدة دلوقتي بتتمنى بس “رد” من اللي بتحبه. من بره الناس شايفاها عاشقة مخلصة متمسكة بحبها. شكل القصة رومانسي وكأنه دليل على عمق المشاعر.
لكن من جوه ؟الحقيقة مختلفة تماما هي مش بتعيش حب هي بتعيش استجداء هي مش مطمنه هي معلقه واللي قدامها عارف إنه مهما غاب أو ساب هتفضل مستنياه.
الظاهر “حب” لكن الحقيقة “نزيف صامت”.
الظاهر “قوة "لكن الحقيقة “انكسار داخلي”.
الظاهر “قصة رومانسية” لكن الحقيقة “معركة من طرف واحد”.
المسلسل يعملنا إن الخداع مش دايمًا جاي من الآخر ساعات الخداع بيبدأ مننا. إحنا اللي بنحب نصدق الصورة اللامعة وننكر الوجع اللي تحتها بنعيش “كما يبدو” ونهرب من مواجهة “كما هو”.
والحقيقة اللي لازم نقولها بصوت عالي:
الحب اللي يخليكي تترجي مش حب.
الحب اللي يخليكي تستني كلمة عشان تحسي إنك موجودة هو حب ناقص.
واللي يحبك بجد عمره ما يخليكي تعيشي الدور ده عمره ما يحطك في موقف يجرح كرامتك.
زي ما المسلسل بيكشف في كل حكاية إن في بعد تاني للواقع لازم إحنا كمان نكشف البعد الحقيقي في علاقاتنا. نسأل نفسنا: أنا عايشة حب فعلاً؟ ولا عايشة وهم متقن التمثيل؟
في النهاية "ما تراه ليس كما يبدو” مش مجرد اسم لمسلسل ده عنوان لحقيقة حياتنا اللي يبانلك حب ممكن يكون استنزاف واللي يبانلك تعلق ممكن يكون ضعف واللي يبانلك حكاية رومانسية ممكن يكون مجرد مشهد مؤقت نهايته أقرب مما تتخيلي.
الحب الحقيقي مش محتاج استجداء ولا بيعتمد على صبرك في انتظار كلمة الحب .
فاسألي نفسك: هل أنتي في حب ولا في وهم متقن الإخراج؟
