إبرام يوسف يوضح حقيقة تعرضه لأزمة الاختفاء الأخيرة (فيديو)
تداولت صفحات مواقع التواصل الإجتماعي مؤخرًا بعض الأنباء التي تُشكك في مصداقية تعرض الطالب المسرحي إبرام يوسف إلي الأختفاء، وأن هذا الأمر فعله ليحصل على التريند.
حقيقة التريند الكاذب
فخرج الطالب المسرحي إبرام يوسف عن صمته ليوضح حقيقة الأمر، وذلك من خلال مقطع فيديو عبر حسابه الرسمي على موقع التواصل الإجتماعي فيسبوك، وقال خلال الفيديو: “الفترة اللي فاتت في ناس طلعت وقالت أني مكنتش في أزمة .. وأني عملت كده عشان أطلع تريند .. وحاجات رخيصة كده أنا معملهاش .. أنا نفسي عارف والناس القريبة مني عارفين أني بجتهد طول الوقت .. سواء بتمرن أو بروح أعمل أوديشن .. مبسيبش حاجة إلا لما بعملها عشان انجح .. حتى وأنا باموت من التعب مبسيبش فرصة .. ولما بقصر .. كل اللي حواليا عارفين أني ببقى مضايق أوي من نفسي .. لدرجة أني ممكن أتخانق مع نفسي”.
إبرام يوسف يشكر الله على خروجه من الأزمة
واستكمل إبرام يوسف حديثه قائلًا: “أنا فعلا مريت بأزمة .. ومش حابب اتكلم عن تفاصيلها .. والحمدلله خلصت وأنا طالع منها سليم .. والناس اللي معايا طلعت سليمة .. كانت تجربة جديدة عليا .. تعبان منها شوية .. بس خلاص خلصت على خير .. يا جماعة متزودوش الضغط عليا .. لأني أنا أصلا مضغوط .. أنا متعودتش أطلع اتكلم عن الحاجات دي .. لأني اتربيت على أني أكون قوي .. مادام عديت أي مشكلة .. هتلاقوني بضحك وبهزر وعايش حياتي عادي .. متربيتش أني أطلع اشكي أو اقول يا جماعة عندي مشكلة .. ربنا مديني موهبة جوايا .. هيجي وقت وهتطلع وتبان .. وهكبر .. مش بأني أعمل تريند كداب ولا أني أغش".
إبرام يوسف يشكر الدكتور أشرف زكي
واختتم إبرام يوسف حديثه قائلًا: "ياريت منزايدش على بعض .. الموضوع خلص بس متعب .. واللهي بحبكم كلكم .. وشكرًا للناس اللي شجعوني وداعموني .. والناس اللي بتطمن عليا .. وحتى الناس اللي عايزة تعرف تفاصيل فوق دماغي .. اتمنى من كل قلبي أن الناس تهدأ عليا شوية .. مش كل الناس في ناس في منتهى الجمال .. كده كده ربنا عارف الحقيقة .. أنا مش عايز اتشهر الشهرة دي .. أنا عايز اتشهر شهرة نضيفة .. والشهرة النضيفة دي هتيجي هتيجي .. أنا متأكد أن ربنا هيجبلي الشهرة النضيفة دي لأني مجتهد .. وبعمل أكبر ما في وسعي .. وبشكر الدكتور أشرف زكي على وقوفه جنبي .. وبشكركم كلكم على مساندتكم”.
