عندي كورونا وكاوتش عربيتي اتفرتك.. داليا البحيري تروي أزماتها هذا الصيف
كشفت الفنانة داليا البحيري، عن مواجهتها العديد من الصعوبات خلال قضائها إجازة الصيف الجاري، حيث أشارت إلى مرضها لمدة 3 أسابيع، ثم مرض زوجها، وصولًا إلى انفجار إطار سيارتها عند عودتها من الساحل الشمالي للقاهرة.
أنا من محبي الصيف جدًا
وشاركت البحيري، عبر حسابها الرسمي على إنستجرام، صور لإطار سيارتها، وعلقت : “الحمد لله على كل شئ طبعًا.. لأننا لازم نحمد ربنا على كل حاجة وفي كل وقت .. اللي يعرفوني كويس هيعرفوا أني من محبي شهر الصيف جدًا .. بحب البحر والشمس والسمار ولمة العيلة وكل حاجة في الصيف جميلة حتى فاكهته”.
السنة دي كانت من أسوا الصيفيات اللي عدت عليا
وتابعت : “بس الحقيقة السنة دي كانت من أسوأ الصيفيات اللي عدت عليا في الساحل .. يتخللها بعض اللمحات الجميلة مع العيلة وبعض الأيام الطيبة .. بس للأسف كنت مضغوطة جدًا .. كنت بعزل من بيت لبيت .. ودي كانت حاجة مفاجأة مش مترتب لها عشان كده كنت مشدودة”.
داليا البحيري تكشف عن مرضها ومرض زوجها
وأكملت داليا : “مناعتي وقعت وبقالي 3 أسابيع عيانة جدًا .. جالي دور برد أو كورونا أو زي ما تحبوا تسموه .. ولما ابتديت أخف شوية .. حسن جوزي اتعدى وتعب جدًا اكتر مني بكتير .. لدرجة أننا اضطرينا نروح مستشفى وقعدنا 4 ساعات هناك في الديپ فريزير .. تكييف عالي جدًا جدًا .. لدرجة كنا موجوعين من البرد .. رجعنا من المستشفى وبعد أقل من ساعة كانت حرارتي طلعت تاني .. ورقدت ومن يومها وأنا مش بتحسن”.
كاوتش عربيتي اتفرتك
وواصلت داليا البحيري : “ويكتمل السيزون برجوعي سايقة من الساحل وأنا تعبانة .. لأني كان عندي ارتباط مهم في القاهرة.. والكاوتش بتاع عربيتي يتفرتك ويطلع دخان .. بحمد ربنا أنه كان عند دخلة البوابات وماكنتش ماشية بسرعة .. ده ستر ربنا الجميل”.
كان صيف مشحون جدًا
واختتمت داليا مشيرة إلى صعوبة هذا الصيف بالنسبة لها، حيث كتبت : “باختصار كان صيف مشحون جدًا .. بس برضو هافضل أحب الصيف وأفضله .. دعواتكم بقى أخف لأني استويت .. ملحوظة أنا مش بحب أعمل بوستات زي دي .. عشان أنا عمري ما كنت بتاعت صعبانيات .. وكمان كان لازم أشكر رجال المرور اللي كلهم شهامة وساعدوني وركبولي الإستبن .. أي نعم كانوا عايزين يمشوني بسرعة عشان في تشريفة سيادة الوزير معدية .. بس برضو جدعان”.
أحدث أعمال داليا البحيري
ومن ناحية أخرى، تنتظر الفنانة داليا البحيري عرض تحديد موعد عرض مسلسل بدون مقابل، والذي كان من المقرر أن ينافس ضمن موسم دراما رمضان 2024 ولكن غادر السباق، ثم تقرر عرضه في رمضان 2025، قبل أن يغادر كذلك لأسباب رقابية وعدم اكتمال تصوير مشاهده.
وتقدم داليا خلال أحداث المسلسل شخصية أرملة وتعمل أخصائية اجتماعية وتعول عدد من الأبناء، ويتناول المسلسل يتناول بطولات رجال الأمن في مواجهة الإرهاب وأعداء الوطن، وذلك في إطار اجتماعي تراجيدي تشويقي
مسلسل بدون مقابل، مكون من 30 حلقة، وهو بطولة هاني رمزي، داليا البحيري، وفاء عامر، خالد سليم، عمرو عبدالجليل، نسرين طافش، أيتن عامر، منة فضالي، محمد أبو داود، حنان يوسف، هبة عبدالعزيز، وشادي هاني رمزي، والمسلسل تأليف حسام موسى، إخراج جمال عبدالحميد، وإنتاج شركة أفلام محمد فوزي.
