أنا مش كيس شيبسي ولا براند .. أمير عيد ينتقد تباهي النجوم بالمشاهدات
انتقد الفنان أمير عيد، قائد فريق كايروكي، تباهي عدد من النجوم بأرقام المشاهدات التي يحصدونها من أغانيهم أو أرقام الحاضرين في حفلاتهم، حيث أشار إلى أن الفنان ليس سلعة للبيع.
مش بفهم ليه الناس مهووسة بفكرة الأرقام
وقال أمير خلال حفله بالأمس في حفل ختام فعاليات الدورة الثالثة من مهرجان العلمين : "في حد بيقول إن حفلته هي الأكبر وهي الأضخم .. وبيقولوا إننا عملنا في ستاد القاهرة أكبر حفلة في تاريخ مصر .. لكن يعني علشان أكون صريح .. الحقيقة أنا مش بفهم ليه الناس مهووسة أوي بفكرة الأرقام الأكثر مشاهدة والأكثر متابعة .. واللي عنده أجمد عربية وأجمد ساعة .. اعتقد يعني ده لو دل على شيء فهو بيدل على الشخص اللي بيبقى فاضي من جوا بيحب يبقى من بره".
الحاجات الرخيصة هي أكتر حاجة بتتباع
وتابع : "عمومًا الحاجات الرخيصة هي أكتر حاجة بتتباع .. ولذلك يعني الأرقام أحياناً ممكن تبقى دليل على الرخص .. وافتكر إن أمي مرة قالتلي إنك عمرك ما تبقى شخص غني إلا لو كان عندك حاجة الفلوس مابتشتريهاش .. ودلوقتي السوشيال ميديا بتحسسنا إننا مش عايشين وبنشوف ناس عاملة نفسها مبسوطين وفرحانين .. ودي مش ناس حقيقية لكن أنتم ناس حقيقية".
الموضوع عمره ما كان بالعدد
كما أشار أمير عيد إلى سعادته بحماس الجمهور في الشارع لحفله، قائلًا : "ناس كتير وأنا في الطريق من القاهرة للحفلة طلعولي التذاكر بتاعت الحفلة وأنا في العربية وبيسلموا عليا .. وكلهم عندهم حماس شديد جدًا .. والموضوع عمره ما كان بالعدد .. الموضوع في الروح اللي هما بيدوهالنا .. وحتى لو كان الحضور النهارده نص العدد أو إن شاء الله كانوا 10 أشخاص كنت هبقى فخور وهعمل نفس الحفلة .. المهم مش كام المهم القيمة".
أنا مش براند ولا كيس شيبسي
واختتم أمير عيد موجهًا رسالة إلى الجمهور : "أنا بعمل الأغاني اللي بحبها مش علشان أكون براند أو سلعة .. أنا مش كيس شيبسي علشان أبقى نفسي أبيع أكتر حد .. وأنا فنان حر والشيء اللي بيحركني هو أفكاري وقناعاتي .. وبغني لجمهور حر عنده أفكار وبيحب يفكر .. شكرًا ليكم على ثقتكم وإنكم جمهور ملهم .. وأنا زمان كنت فاكر إني بغني في الأوضة لوحدي ومحدش هيسمع اللي أنا بعمله .. لكن وجودكم غير كل شيء وأنتم السبب دلوقتي إني مش بغني لوحدي .. وإن الأغاني دي تعيش .. وإني مش لوحدي في العالم اللي بقى دلوقتي دمه تقيل ومش حقيقي .. شكرًا".
تفاصيل حفل كايروكي في العلمين
وكان قد تألق فريق كايروكي في حفله منذ ساعات قليلة بمهرجان العلمين، حيث قدم الفريق مجموعة من أشهر أغانيه، والتي اختتمها بأغنية كل حاجة بتعدي، وقبلها غنت الفرقة أغنية عيون الناس التي جمعتها بالفنان تووليت في ألبومه الأخير.
وكان قد مازح أمير عيد قائد فريق كايروكي الحضور، قائلًا : "مبسوط إني بغني مع تووليت وأنا عارف شكله".
