ذكاء صناعي قاده إلى الحجز..حقيقة حبس الشاب عبد الرحمن بعد فيديو افتتاح المتحف

تداول رواد مواقع التواصل الاجتماعي خبر القبض على الشاب عبدالرحمن خالد، بعد نشره عبر صفحته الشخصية على فيس بوك فيديو ترويجي مضلل عن افتتاح المتحف المصري الكبير، ظهر خلاله النجمان ليونيل ميسي ومحمد صلاح ضمن الإعلان الترويجي، وفقا لرواية عدد من المقربين منه.

حقيقة حبس الشاب عبدالرحمن خالد

وبحسب منشورات متداولة، فإن الشاب محتجز منذ مساء أمس داخل قسم شرطة الهرم دون توجيه اتهام رسمي أو ترحيله لأي جهة أمنية أخرى حتى الآن.

وكتب أحد الأشخاص يُدعى أحمد صقر عبر حسابه على "فيس بوك" قائلًا:
عبدالرحمن من امبارح في قسم الهرم محتجز ..حتي الان لم يوجه له اتهام او يرحل للامن الوطني ..مشكلة عبدالرحمن مش انه عمل فيديو ترويجي عن المتحف ..مشكلته ان الفيديو اتشير ٣ الاف مره و انتشر و الناس بدأت تتعامل معاه انه فيديو رسمي ترويجي لافتتاح المتحف مع انه قايل علي حسابه الشخصي ان ده فيديو مصنوع بالكامل بالذكاء الصناعي و انه اجتهاد شخصي منه.

وأضاف: ذنبه ايه ان واحد بوزن نجيب ساويرس و شخصيات عامه تانيه ينتقد الحكومه انها جايبه ميسي مع صلاح في الفيديو فوزارة السياحه تنزل بيان ( والنعمه ما عيالي ) و تنفي علاقتها بالفيديو اللي انتشر ونعرف من بيان الوزاره ان الشركة المتحده للاعلام هي اللي مسئوله عن الترويج للمتحف ..طب ماهو دايما في محتوي رسمي و محتوي fan made بدل ما نحبس ال Fan مفروض اصلا نستخدمهم و نصنع منهم موجه اكبر من المحتوي الرسمي لو في حد بيفكر …المريب بالنسبالي ان عبد الرحمن جاله اتصال من شركة المتحده وقابل استاذ اسلام عبدالحميد  اللي حسب كلامه.

وأكمل: عبدالرحمن اتعرض عليه يشتغل معاهم والراجل مرفضش هو فقط قال انه بيعمل ستارت اب متخصصه في صناعة المحتوي بالذكاء الصناعي اسمها ( Egy AI media production) وانه مستعد ينفذ فيدوهات بالذكاء الصناعي لشركة المتحده تخص المتحف المصري و غيره  بنصف التكلفه المتعارف عليها في السوق واعتذر انه مش عايز يشتغل موظف ب أجر بعد ما قطع شوط من التدريب و التعلم الذاتي في مجال جديد هو عايز يبني فيه ستارت اب و لو مكانش عبدالرحمن شاطر في صناعة المحتوي بالذكاء الصناعي وانتشر مكانش زمانه دلوقت في هذه المحنه.

وأضاف: عبدالرحمن تاني يوم مقابلته مع استاذ اسلام من الشركه المتحده صحي لقي شركه اخري تابعه للمتحده يديرها الفنان عصام السقا اسمها هاشتاج عامله claim في الفيس بوك انها مالكة الفيديو  و اتمسح الفيديو من حساب عبالرحمن والفيس بوك قاله انت ناشر فيديو ملكيته تعود ل شركة هاشتاج وبعدها بيوم نزل بيان وزارة السياحه اللي بتنفي فيه صلتها بالمحتوي المنتشر و انها هاتاخد اجراءات قانونية ضد صانع المحتوي برغم ان صانع المحتوي قايل انه مش فيديو رسمي وانه مصنوع بالذكاء الصناعي وانه في مساحة الfan made الراجل تقنيا معملش جريمه حتي لو الاسكريبت كلنا لينا فيه رأي انا شخصيا قولت لعبدالرحمن الفيديو طويل والافضل تحيب شخصيات تاريخية تدي معني لافتتاح المصري واقترحت عليه يعمل نسخه معدله يظهر فيها كمثال  رفاعة الطهطاوي و أحمد شوقي وسعد زعلول  و أحمد زويل و عبدالمنعم رياض و ابراهيم الرفاعي و أحمد منسي و غيرهم من الشخصيات اللي ظهورهم يبقي ليه معني في افتتاح المتحف غير لعيبة الكورة و الممثلين اللي جايبهم  مع كامل احترامنا ليهم.

وأردف: بس عبدالرحمن النهارده كا شاب موهوب اجتهد و استخدم موهبته في صنع محتوي بالذكاء الصناعي النهارده موجود في قسم الهرم بيواجه تهم كتير جاهزة لما يحصل قلق في الرأي العام بسبب محتوي ما ينفع تتحط في محضر  اقلهم التربح و اساءة استخدام وسائل التواصل الاجتماعي و تمد السطر لحد ما توصل للانضمام الي جماعة محظورة.

وأضاف: بس تخيل معايا كده لو كان الجهات الرسمية اتعاملت بخيال مختلف  اتطلب منه يعدل اول يشيل حتي الفيديو بالاسكريبت الركيك و الوزارة تنزل بيان انه فيديو غير رسمي و fan made و ترحب بكل الموهوبين انهم يعملو موجه فيدوهات fan made شرط انها تتبعت علي الشركة المسئوله عن ذلك to be approved و يتعمل مسابقه ما بين كل صناع المحتوي من هنا لحد افتتاح المتحف الفيديو الفائز فيها يحصل علي جايزه كبيره و يعرض الفيديو بتاعه في الافتتاح.

وتابع: تخيل حالة الحراك و الرواج و تشجيع المواهب و الاحساس بالمشاركه و الانتماء و الفخر و الحماس في العد التنازلي لافتتاح المتحف.

وأوضح: وتخيل دلوقت لو عبدالرحمن اتحبس ومخرجش من قسم الهرم عاي بيته و اترحل علي جهه تحقيق واتوجه له تهم ومخرجش يحضر افتتاح المتحف اللي حاول و اجتهد انه يساعد في الترويج لافتتاحه ساعتها كل الشباب المتحمس زي عبدالرحمن هايحس ب ايه وهيتعامل مع المناسبه التاريخية لافتتاح المتحف المصري ازاي .

واختتم حديثه قائلًا: اتمني بعد التأكد من كل التفاصيل المذكورة اللي تخص عبدالرحمن انه يخرج ل بيته و يرجع للعمل في شركتة الناشئه ويعمل فيديو ذكاء صناعي مستخدما فيها موهبته و اللي اتعلمه في هذا المجال ب اسكريبت مختلف ومتفق عليه من وزارة السياحه و الشركة المتحده و نكتشف مع بعض ان الدعم أهم من الردع لمستقبلنا كلنا واننا عايزين افتتاح المتحف المصري يبقي حدث مؤسس للاتحاد مش للفرقه.