تصريحات السيسي كانت واضحة وتشير أول ما تشير إلى "محمد سامي".
ودي مش المرة الأولى فيما يخص محمد سامي، لأن البعض نقل في رمضان ٢٠٢١ استياء السيسي من مشاهد بعينها في "نسل الأغراب" تمسّ صورة الداخلية وتتعلق بمقدار العنف الوارد في المسلسل.
وفي تقديري الشخصي السيسي بيتكلم عن الدراما مش لاجل الدراما في المقام الأول ولا المقام العاشر. إنما بيقول أنا متابع وشايف ومنغمس، لأنه شاف مبارك بينتهي تدريجيا لما انعزل في سنينه الأخيرة واتسعت فجوة درايته بشعبه وبالمتغيرات اللي بتحصل في المجتمع المصري.
هتقول يعني السيسي شايف الدراما عشان يقول أنا متابع ومش شايف الأسعار؟
هقولك هو شايف ومدرك من أول رقصة كيكي "زوّد البنزين ياباشمهندس طارق متقلقش" لحد رقصة "إش إش"، بس بيقرر يشتبك مع مايريد في الوقت الذي يتمكن فيه من الاشتباك ومن كلفته وتبعاته.
فسعر الجبنة الاسطنبولي ومحتوى دراما رمضان وترند كيكي وكل ده حشو بالنسبة له بيقول بيه أنا شايف ومتابع كل حاجة في البلد حتى لو الإقليم حواليا بيتطربق.
وهو في آخر كام ظهور ليه فايق ورايق، وده يمكن لأنه حس بمساندة شعبية حقيقية في آخر شهرين.. مش بموجة تأييد مُخلّقة أو مفتعلة.
فالموضوع كله جسر وحشوة بيستخدمها عشان يقولك: أنا هنا.
وعموما-وبمعزل عن كل شيء- فالخصومة مع منتجات محمد سامي من أمارات الفطرة السوية..
