تامر حسني يدعم محمد سامي بعد إعلان اعتزاله الإخراج التلفزيوني

وجه الفنان تامر حسني رسالة إلى المخرج محمد سامي بعد إعلان اعتزاله الإخراج التلفزيوني؛ حيث عبر عن دعمه الكبير ورفضه لفكرة الاعتزال.

وكتب حسني عبر حسابه الشخصي إنستجرام : " إوعى تكون عايز تبعد عشان أي إحباط.. جايز يكون فعلاً في بعض المشاهد اللي الناس انتقدتها.. وأنا شخصياً استغربتها شويه و قولت جوايا أنك مش محتاج تعملها أصلاً.. لأن عندك الحقيقي والأهم . بس على رأيك الفنون جنون أحياناً فكرة مجنونة تنال الإعجاب و فكره لأ، بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مره".

تابع :" يمكن الحظ محالفكش أوي في عمل ولا ٢ على مدار ١٤ سنة، ودي حاجه مينفعش الجمهور ينساهالك، أنت قدمت مسلسل "آدم" اللي جمع كل المصريين وكل الوطن العربي يتفرجوا عليه زي ماتشات الكوره، بسبب أنه أتكلم عن قضية تخص كل الوطن، وكان بداية لصورة جديدة أول مرة كانت بتتقدم في مصر، وبعدها "سبق الإصرار" و"حكاية حياة" اللي كانوا نقلة كبيرة في ديكورات الدراما المصرية وبعدين "الأسطورة" و"البرنس" و"جعفر العمدة"، اللي حققوا نجاحات ساحقة، وكانوا أعلى نسبة مشاهدات في الدراما بشكل عام، وبعدهم "نعمة الأڤوكاتو" و"إش إش" و"سيد الناس" اللي برضو كل واحد فيهم أعلى مشاهدة يا تاني أعلى مشاهدة.

وأضاف تامر حسني:" هزعل منك لو هتمشي محبط وأنت أنجح حد … الشجرة الخضراء الجميلة ساعات بيطلعلها ورق أصفر بسيط عادي بيتقص وبتفضل شجره كبيرة وجميلة وده التطوير الطبيعي للبني آدم، واللي بيمر بيه أي ناجح بيطور وعنده شخصية، بدليل مسلسلاتك بيتقال عليها مسلسلات محمد سامي، وتركيز الناس معاك دليل على حبهم لأعمالك، ورغم إن بعضهم بينتقدوها بس متابعينها حرف حرف، ونقدهم ليك بيبقى على قد حجمك وهي دي ضريبة الناجحين الكبار ".

وأكمل: سافر وكمل حلمك وأنت منتصر بتاريخك وأوعى تُحبط، وأنا عارف إن محمد سامي اللي أكتشفته أنا وقدمته للصناعة وهو عنده ٢٧ سنة، لايمكن هيتهز، ممكن يزعل يومين ويراجع نفسه في مشاهد، أنا مبسوط منك أنك بمنتهى الشجاعة الأدبية أعتذرت على تقديمها، خد راحه شويه وارجع أقوى من الأول، وأنا واثق من اللي هتسافر عشانه أنه قرار هيضيف نقلة كبيرة لمشوارك
أوعى تخلي الزعل من بعض المشاهد ينسيك أنت قدمت ايه للدراما".

واختتم  الفنان تامر حسني:" ياريت قبل ما تقسوا على سامي بالطريقة دي، نفتكر هو أمتعنا سنين قد إيه بمسلسلاته، وأنا ذكرتها كلها عشان لو حد ناسي أفكره، وعشان لو هو محبط يجمد تاني، ربنا ينور طريقك وترجع أقوى وأقوى من أي وقت، واثق فيك يا حبيبي، وأنا هفضل أخوك الكبير، وفي ضهرك إن شاء الله طول العمر يا بطل.

اعتزال محمد سامي 

وكان المخرج محمد سامي أعلن اعتزال الإخراج الدرامي قائلا :" وداعا الدراما التليفزيونية، السنة دي كانت آخر أعمالي التليفزيونية، واللي فيها بودع المسلسلات، رحلة طويلة حوالى 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايما الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور، يمكن المقربين ليا عارفين إني واخد القرار ده من فترة وهو اعتزال الإخراج التليفزيوني، ولكن كنت بنتهي من التزامات موقعة مع شركات ونجوم والحمد لله انتهيت منها وكان آخرها 2025، معنديش حاجة أكتر أقدر أقدمها في التليفزيون، وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل، والوحيد القادر على الدوام هو الله وحده"