ياسمينا العبد تكشف صعوبة دور نجلة المتحرش في مسلسل لام شمسية
أجرت الفنانة الشابة ياسمينا العبد مداخلة تليفونية في برنامج تفاعلكم الذي تقدمه الإعلامية سارة الدندراوي، ويُعرض يوميًا على القناة العربية، ةتحدثت خلال المداخلة عن صعوبات دورها كابنة المتحرش في مسلسل لام شمسية الذي يشارك في النصف الثاني من موسم رمضان الحالي.
حديث ياسمينا العبد عن تخوفها من دورها في لام شمسية
تحدثت الفنانة الشابة ياسمينا العبد عن مسلسل لام شمسية، وقالت: “المسلسل بيناقش قضية مهمة وهي التعدي الجنسي على الأطفال .. وللأسف هي قضية موجودة في مجتمعنا .. والناس مش عارفة حاجة فكان لازم نوعي الناس .. ومش بس نوضح المشكلة لكن كمان سلطنا الضوء على الحلول اللي ممكن نتابعها .. ومن المهم أن الطفل يلاقي مساعدة عشان يقدر يتعايش فيما بعد .. أنا فخورة بمشاركتي في العمل ده”.
وتطرقت ياسمينا للحديث عن صعوبة دورها كابنة للمتحرش في مسلسل لام شمسية، وقالت: “الدور كان صعب وتقيل ومليان تفاصيل كتير .. كنت بعمل بحث عميق عن الدور وعن تفاصيله .. عشان اقدر اطلع مشاعري بصدق”، وتحدثت عن وجود سارة عزيز ومتابعاتها لهم طوال فترة التصوير، ووجودها كمتخصصة في حماية الأطفال كان شئ مهم وضروري، وقالت: “سارة قعدتنا اتكلمت معانا بشكل عميق .. كان في كمية تفاصيل أنا معرفش أنها موجودة في العالم مش بس في مجتمعنا .. ومن أغرب الأشياء أن مش بس الأغراب هما اللي بيعملوا كده ده معظم حالات التحرش بتبقى من أشخاص قريبين جدًا للطفل .. واكتشفت بردو ان التحرش مش بس بيحصل للبنات لا في حالات كتير كانت ضحاياها ولاد .. بس بسبب الضغوطات الإجتماعية الولد بيحس أنه مينفعش يتكلم لأن ده هيقصر على رجولته”.
حديث ياسمينا عن علي الذي جسد دور يوسف “ضحية التحرش"
وقالت ياسمينا عن علي: “علي ده النجم بتاعنا .. لو مبقاش حاجة كبيرة دلوقتي هيبقى من أنجح وأكبر الممثلين في بعد .. أنا بحيه وبحيي والدته اللي كانت دايمًا داعم له وسند طوال فترة التصوير .. هو عامل الدور بشكل خطير .. وحقيقي كل اللي اتعرض ولا حاجة بالنسبة للي جاي”.
أما عن مشهد المواجهة بين ياسمينا وأمينة خليل، قالت: “كان اول مشهد نصوره .. كنت متحمسة أوي للمشهد ده .. مريم نعوم كاتبة نص فظيع .. ساعدنا لأنه حقيقي أوي .. زينة دورها كان صعب لأنها محطوطة في النص ومحدش بيفهمها حاجة .. وهي كبيرة خلاص هتدخل جامعة وقادرة تستوعب ان في حاجة غلط”.
