"فلسفتى فى الحياة اتغيرت".. عمرو أديب يكشف عن ما هو أفضل له مستقبلًا
نشر الإعلامي عمرو أديب على صفحته الشخصية عبر منصة "إكس" تغريدة كشف فيها عن الحياة التي يمر بها حاليا وما أفضل له، والتغييرات التي طرأت على حياته.
وكتب عمرو أديب على صفحته الشخصية عبر منصة "إكس": "بقيت بفضل الدولة المارقة العصبية عن الدولة العاقلة الحكيمة، بقيت بفضل التغيير المستمر عن الثبات الطويل، بقيت بفضل أمير عيد عن حمزة نمرة، بقيت بفضل الصمت عن الحقيقة المايعة، بقيت بفضل الموقف بدرى عن الانتظار والترقب والتحليل، بقيت بفضل أقول رأيي فى الحاجه الوحشة ومجاملش علشان مازاعلش، بقيت بفضل إمام عاشور عن زيزو، بقيت بفضل المطربين الشعبيين عن مشاهير الغنا، بقيت بفضل إن شرين تبقى جاهزة عن انها تظهر كتير".
وتابع أديب: "بقيت بفضل الدولة اللى فيها سياسيين عن الدولة اللى فيها رأسماليين، بقيت بفضل الست الناضجة عن الست المنطلقة المجنونة، بقيت أفضل الساندويتشات عن الصوانى، بقيت بفضل السي فود عن اللحوم، بقيت بفضل المذيع الموهوب عن المذيع المتلقن، بقيت بفضل المنجه المقطعه عن المنجه الفص، وبقيت غاوي مقاطع أم كلثوم القديمة عن الغنا كله وبقيت بفضل الخدمة الحلوة عن مطاعم الشارع العشوائية وبقيت بفضل الساعات الرقيقة عن الساعات الضخمة، وبقيت بحب الإجازة عن الشغل، وبقيت أفضل الصرف عن التحويش، وبقيت بفضل الكلام فى السياسه والبلد عن الكلام فى الفن والنميمة، وبقيت بفضل النوم مرتاح عن النوم قلقان بعد خناق فى الشغل، وبقيت بحب الأوبرا عن المزيكا الصرفة".
و"بقيت بحب العربيات الغريبة عن العربيات الضخمة، وبقيت بحب الساحل عن أي مكان فى العالم ، وبقيت مش بقلق من اي حاجه عن ما كنت بحسب كل حاجه ، وبقيت بحب الهدوم المريحه غير اللى عليها ماركات ، وبقيت افضل الكميه القليله عن الكتير التافه وبقيت لا اسمع كلام ما بعجبنيش ولا اكل اكل ما يكيفنيش ولا اقعد مع ناس ممله ما تسلينيش".
"ومبقتش عايز ادخل فى خناقات او اجاوب على اسئله على شاكله هو احنا زمان كنا احسن من دلوقتى ! عايز بقى حواليا ناس عقل مش عضلات عايز بنى ادمين حنينه مش افترا عايز الناس تسيبنى فى حالى زي ما سايبهم فى حالهم ، عايز اقدر لما اشوف انتخابات غريبه ااقول انها غريبه وعجيبه ، عايز اشرب كل يوم الصبح عصير مانجه اسمعلاوى ، وعايز اشجع الزمالك من غير ما استنى انه ياخد الدورى وعايز أعرف إن الأهلى علينا حق !".
