بدرية طلبة تنفي القبض عليها: أنا ما قتلتش جوزي ومش بتاجر في الأعضاء
خرجت الفنانة بدرية طلبة في فيديو لايف على صفحتها الشخصية بموقع فيسبوك، تعبر فيه عن استيائها الشديد من الحملة الموجهة ضدها وضد بعض الفنانين، واتهامها بالكثير من الشائعات، منها قتل زوجها والتجارة في الأعضاء.
أنا أجرمت في إيه علشان يتقبض عليا؟
وقالت بدرية طلبة:" لقيت أختي بتكلمني وهي مخضوضة وبتقول لي إنتي فين؟ اتقبض عليكي؟. ليه أجرمت في إيه علشان يتقبض عليا".
وأكدت بدرية طلبة، أنها لم تسئ للشعب المصري ولكن حديثها موجه لفئة صغيرة تهاجمها وتسبها، حيث قالت:"أنا بكلم الشعب المصري المحترم.. بالله عليكم لما تكونوا قاعدين في أبلكيشن لا ليكم ولا عليكم ولا أجرمتم في حق حد، وتلاقوا ناس داخلة يشتموكم هتقولوا إيه.. واحد بيقول قتلتي جوزك وبتجاري في الأعضاء وشحاتة ومطبلاتية، أرد أقول إيه".
وأضافت بدرية طلبة: “أنا أصغر عيل في الشعب المصري المحترم جزمته على دماغي، والشوية اللي بيدخلوا يسفزونا وإحنا في حالنا، ويسبونا في أعراضنا، دول مالهمش علاقة بالشعب المصري، وعيب لما الشعب المصري ينساق وراء شوية لجان ويصدق كلامهم، الشعب المصري مفيش فيه راجل ولا ست محترمة هضيع دقيقة من وقتها وتدخل على أبلكيشن تشتمني وتسبني في عرضي، الشعب المصري أرقى وأحسن من كده بكتير، اللي دخلوا ليا لجان، زي واحد قال لي اتفوا عليكي وعلى أهلك، أنت تعرف أهلي منين، وأنا ست دمي حامي مش هغير طبعي، أنا بردح علشان أنت واللي زيك بتستفزوني. إيه الافترى ده”.
وتابعت بدرية طلبة: “اخدوا كلامي قصوه وقالوا أني بشتم الشعب المصري أنا بشتم اللجان والخرفان. إنما الشعب النصري بالريس أسيادكم.. أنتم عمركم ما هتكونوا اسباد البلد”.
وأردفت: “من يوم ما اتهموا صاحبتي وفاء عامر بالتجارة في الأعضاء، ولقيتهم بعدها دخلوا عليا وأكون قاعدة ألاقيهم بيقولوا الكبدة بكام؟ والعضو ده بكام؟. أنا رد فعل فقط، أنا ما شتمتش الشعب المصري، شعب مين المصري اللي هشتمه اللي أصغر عيل فيه بيتصور معايا ويقولي يا بدارة، الشعب المصري هما اللي عملوني وعملوا غيري، أكبر نجم فيكم يا مصر أهل البلد اللي عاملينه، اتقالي ما تطلعيش وما ترديش، لكن اللي بيحصل فيا وفي عرضي اوفر”.
