لست الحبايب.. أفكار لهدايا عيد الأم على "قد الإيد"

عيد الأم مش لازم يكون مناسبة مكلفة، الأهم هو الاهتمام والتقدير اللي بتحسه في هديتك، ممكن حاجة بسيطة تفرحها أكتر من هدايا غالية، خاصة لو فيها لمسة شخصية أو فكرة بتلامس قلبها، لو بتدور على أفكار هدايا على قد الإيد، لكن بقيمة كبيرة لديها.

جرب واحدة من اقتراحات "نيوز رووم"

1. جراب موبايل بتصميم مميز

اطبع لها صورة العيلة على جراب الموبايل، هتكون هدية عملية وذكرى جميلة تفضل معاها طول الوقت.

2. حاجة نفسها فيها

لو كانت بتتكلم عن حاجة معينة نفسها تشتريها، زي مستلزمات مطبخ معينة او ملابس ما، فهي فرصة إنك تجيبها لها وتفرحها بيها .

3. راديو مطبخ شيك

الفترة دي الراديوهات الصغيرة اللي بتتحط في المطبخ بقت موضة، ممكن نقدم لها واحد ليكون رفيقها أثناء الطبخ، ويساعدها على تحسين مزاجها بالموسيقى أو القرآن الكريم.

4. حفلة صغيرة وسط الأحباب

اجمع الناس اللي بتحبهم في حفلة بسيطة في البيت أو في مكان هادئ، وحضروا لها مفاجأة تخلي اليوم ده لا يُنسى، زي ان كل فرد يعمل أكلة بسيطة وتقضوا وقت خفيف بدون تكاليف.

5. خروجة مميزة في رمضان

بما إننا في رمضان، ممكن تعزمها على الفطار في مكان تحبه، أو تعملوا بيكنيك بسيط في حديقة مليانة خضرة وجو ربيعي لطيف مناسب مع مناسبة عيد الام.

6. قفطان أنيق للسحور

بما إن القفطان أصبح من القطع الأساسية في رمضان، هدية زي دي هتكون مناسبة جدًا لسهرات السحور وطلعات الشهر الكريم.

7. ألبوم صور مطبوع

طبع كل الصور الجميلة اللي بتحبها لنفسها أو مع العيلة، وحطها في ألبوم أنيق، الأمهات بتحب الاحتفاظ بالذكريات، وهتكون هدية مليانة مشاعر ودفء، وموجودة ودائمة.

8.برطمان الذكريات

اشترى برطمان زجاجي شيك، واملاه بورق صغير مكتوب عليه رسائل حب وتقدير ليها، ممكن كمان تضيف ذكريات جميلة أو مواقف مضحكة بينكم، كل يوم تفتح ورقة وتلاقي حاجة تفرحها.

9. كتاب مميز مع إهداء خاص

لو بتحب القراءة، اختار لها كتاب في مجال يهمها (رواية، كتب طبخ، تنمية ذاتية)، واكتب لها إهداء بخط إيدك على أول صفحة، هدية بسيطة لكنها مليانة مشاعر واهتمام.