وليد الحلفاوي: «أهديت مسلسل كتالوج لوالدي.. وتجربة الفقد صنعت القرار»
كشف المخرج وليد الحلفاوي عن كواليس قراره بالعودة للإخراج بعد فترة راحة، وعن تفاصيل إنسانية وعائلية صاحبت مشاركته في مسلسل كتالوج، الذي لاقى تفاعلًا واسعًا من الجمهور والنقاد.
بعد "وش في وش".. قرار بالابتعاد ثم عودة مفاجئة
قال الحلفاوي خلال استضافته عبر برنامج "الستات"المذاع عبلر قناة النهار : "بعد فيلم " وش في وش"، كنت مقرر آخذ فترة راحة، ولكن لما قرأت سيناريو مسلسل كتالوج حسيت إن في حاجة بتحركني، المسلسل بيتكلم عن الفقد، وأنا في الوقت ده كنت بدأت أستوعب معناه على مستوى شخصي".
وأضاف: "مهما الإنسان حاول يتخيل الفقد، الحقيقة دايمًا بتكون مختلفة، وبتوجع أكتر.. علشان كده حسيت إني عاوز أعمل المسلسل ده، وفعلاً قررت أرجع من خلاله".
"أهديته لوالدي نبيل الحلفاوي"
ولم يخفِ وليد تأثره الشديد أثناء العمل، حيث قال: "أهديت المسلسل لوالدي الفنان القدير نبيل الحلفاوي، وده لأنه كان آخر عمل أشتغل عليه وهو لسه معانا.. طوال التصوير كان بابا بخير، وكنا بنضحك ونشتغل، وده خلّى التجربة ليها طعم خاص جدًا".
محمود الخطيب ومشهد استثنائي في "التتش"
وفي مفاجأة لم تكن في الحسبان، تحدث الحلفاوي عن كواليس مشاركة أسطورة الكرة المصرية محمود الخطيب في أحد مشاهد العمل، مؤكدًا أن ظهوره أضاف للمسلسل بعدًا واقعيًا.
"كنا محتاجين شخصية كبيرة تدعم شخصية محمد فراج، اللي في المسلسل مش بيفهم في الكورة ومفروض يدعم ابنه، فقلنا لازم نجيب حد عنده قيمة كروية كبيرة، وبدأنا نفكر في الكابتن محمود الخطيب".
وتابع: "في البداية رفض، لكني طلبت من بابا" نبيل الحلفاوي" يكلمه بحكم صداقتهم القديمة، وفعلاً الخطيب وافق وقال" هاجي علشان الشباب والمشهد حلو". وده خلانا من القلائل اللي صورنا داخل ملعب التتش نفسه".
تجربة فنية وإنسانية
واختتم الحلفاوي حديثه بقوله: "كتالوج مش مجرد مسلسل بالنسبة لي، هو تجربة شخصية وإنسانية، مليانة مشاعر وفكر، وفخور بكل تفصيلة فيه".
وفي نفس السياق ، تحدث عن كواليس مسلسل كتالوج، مشيدًا بعدد من النجوم الذين شاركوا في العمل، مؤكدًا أن الأداء المتميز والتفاهم بين فريق العمل كان لهما دور كبير في نجاح المسلسل.
